Минтимер Шәймиев: ”Мансур Хәсәнов Татарстан тарихында тирән эз калдырды”

Бүген Казанның Арча кыры зиратында күренекле дәүләт һәм җәмәгать эшлеклесе Мансур Хәсәнов каберендә бюст ачу тантанасы узды.

Мансур Хәсәнов озак еллар партия һәм совет органнарында эшләде, Татарстан Министрлар Советы рәисе урынбасары һәм беренче урынбасары булды. Ул халык мәгарифе, сәнгать, сәламәтлек саклау, фән һәм мәдәният, физкультура һәм спорт, журналистика һәм иҗат берләшмәләре үсешенә бик зур өлеш кертте. 1992 елда Татарстан Фәннәр академиясенең беренче президенты булды. Татар энциклопедиясе институтына низез салды, аның беренче директоры булды.

Бүгенге тантанага галимнең хезмәттәшләре, уллары һәм оныклары, туганнары, дуслары һәм танышлары җыелган иде. Тантанада ТР Дәүләт Киңәшчесе Минтимер Шәймиев катнашты.

"Мансур Хәсәнов Татарстан тарихында үзенең иҗаты һәм республикага хезмәте белән тирән эз калдырды. Бүген аның истәлеген ташта, сәнгать әсәрендә мәңгеләштерү – бу гомерлеккә", - диде ТР Дәүләт Киңәшчесе.

Минтимер Шәймиев бюстны булдыруда катнашучыларга, беренче чиратта Мансур Хәсәновның балаларына рәхмәт белдерде. “Сез, әтиегез сезне нинди итеп күрергә теләсә, шундый булдыгыз: яхшы күңелле, ата-ананы хөрмәт итүчеләр”, - дип билгеләде ул.

"Ул актив гражданлык позициясе һәм татар халкын яратуы белән аерылып торды. Без Мансур Хәсән улы белән бик яхшы мөнәсәбәттә идек. Бүген монда килүчеләр аның зирәклеген, яхшылыгын һәм киләчәккә карап эшләвен әйтә ала", - дип белдерде ТР Фәннәр академиясе президенты Мәгъзүм Сәләхов.

Бюстның авторы - танылган скульптор, Г.Тукай исемендәге ТР Дәүләт бүләге лауреаты Асия Миңнуллина үзенең скульптура өстендә эшләве турында сөйләде. "Портретта миңа Мансур Хәсәновның эчке халәтен бирү мөһим булды", - диде ул.

Мансур Хәсәновны озак еллар белгән һәм бергә эшләгән кешеләр дә аның күңелен тулысынча аңлап бетерә алмаганнардыр, дип билгеләде Минтимер Шәймиев.