Татарстан Премьер-министры Чиләбедә Муса Җәлилгә һәйкәл ачу тантанасында катнашты

Бүген Чиләбе шәһәрендә Советлар Союзы Герое, бөек татар шагыйре Муса Җәлилгә һәйкәл ачылды. Бу тантанада ТР Премьер-министры Илдар Халиков, Чиләбе өлкәсе губернаторы Борис Дубровский, "Чиләбе өлкәсе татарлары конгрессы" өлкә иҗтимагый оешмасы башкарма комитеты рәисе Лена Колесникова, татар шагыйренең кызы Чулпан Җәлилова, Татарстан делегациясе әгъзалары катнашты.

Һәйкәл Чиләбе үзәгендә, "Манекен" театры янындагы скверда урнашкан. Танылган оста Бакый Урманченың "Таштагы портретлар" сериясеннән скульптурасы Татарстаннан Көньяк Урал башкаласына бүләк булды.

Кунакларны тантаналы вакыйга белән котлап, Илдар Халиков, Муса Җәлил совет солдатларының һәм барлык татар халкының батырлык үрнәге булып тора, дип ассызыклады. Ул Чиләбе өлкәсе губернаторына һәйкәлне булдыру эшләре барышында күрсәткән актив ярдәме өчен рәхмәт белдерде.

"Иң мөһиме шул, без Муса Җәлилгә генә түгел, бөек скульптор Бакый Урманчега да хөрмәт күрсәтә алдык. Останың иҗаты үз урынын тапты. Барыгызны да бу вакыйга белән котлыйм. Бу бөек шагыйрьнең иҗаты белән танышу һәм очрашулар урынына әверелсен иде", - диде ТР Премьер-министры.

Борис Дубровский үзенең чыгышында бу вакыйганың Чиләбе өлкәсе һәм Татарстан Республикасының уртак һәм дустанә эше ярдәмендә мөмкин булуын билгеләде.
"Чиләбе бөек татар һәм совет шагыйре Муса Җәлилгә һәйкәл куелган шәһәрләр исемлеген тулыландырды. Бу чараның Әдәбият елында һәм Бөек Җиңүгә 70 ел тулган елда узуы символик мәгънәгә ия ", - диде губернатор.

Танылган шагыйрьнең кызы Чулпан Җәлилова да Татарстан һәм Чиләбе өлкәсе җитәкчеләренә рәхмәт белдерде. "Мин бөек оста Бакый Урманче иҗатын бик ихтирам итәм һәм бу һәйкәлнең сезнең шәһәрдә булуына шатмын. 2016 елның февралендә әтиемнең тууына 110 ел тула. Сезнең шәһәрдә ул беркайчанда булмаса да, монда аны беләләр, хөрмәт итәләр, аның иҗаты белән танышлар - бу бик сөендерә", - диде Чулпан Җәлилова.