Татарстан Премьер-министры Рөстәм Миңнеханов "Эрнст энд Янг" компаниясе вәкилләре белән очрашты

Бүген Татарстан Республикасы Хөкүмәте башлыгы Рөстәм Миңнеханов "Эрнст энд Янг" ("Ernst & Yang") компаниясе вәкилләре белән берничә юнәлеш буенча мәсьәләләр турында сөйләште. Очрашу ТР Министрлар Кабинетында узды.

Очрашуда "Эрнст энд Янг"ның БДБ буенча идарә итүче партнеры Карл Йоһанссон, "Эрнст энд Янг"ның бизнесны үстерү буенча юнәлеш җитәкчесе Полина Немировченко, ТР сәнәгать һәм сәүдә министры Равил Зарипов, ТР Премьер-министрының тышкы икътисадый эшчәнлек буенча ярдәмчесе Искәндәр Мөфлиханов һәм башкалар катнашты.

Исегезгә төшерәбез: 2010 елның 9нчы февралендә узган очрашуда "Эрнст энд Янг" компаниясе Татарстан Республикасында инвестицион климатны яхшырту өчен закон актларын эшләргә тәкъдим итте. Компания белән эшлекле хезмәттәшлек өлкәләре буларак нефть эшкәртү, нефтехимия, химик җитештерү, полимер чималдан автокомпонентлар җитештерү өлкәсендә эшләүче чит ил компанияләрен җәлеп итү, мәгариф даирәсендә хезмәттәшлек кебек өлкәләр билгеләнгән иде.

Мәгълүмат өчен:

"Ernst&Yang" - аудиторлык компаниясе, дөньяда иң эреләрнең берсе. Аудиторлык компанияләрнең "зур дүртлег"енә керә. Штаб-фатиры Нью-Йоркта урнашкан.

Компания аудит, салымнар һәм хокук, эшлекле килешүләр, консультацияләр бирү кебек өлкәләрдә эшли.

Компаниянең 140 илдә 709 офисы бар, шул исәптән, Россиядә дә.

Россиядә "Ernst & Yang" офислары Мәскәү, Санкт-Петербург, Тольятти, Екатеринбург, Новосибирск, Южно-Сахалинск шәһәрләрендә урнашкан.