Талия Миңнуллина: “Татарстанга Япониянең технологик үсеш тәҗрибәсе кызыклы”

Хәзерге вакытта Япония технологик үсеш ягыннан дөньяда алдынгы урында бара һәм Татарстан өчен аның технологик үсеш тәҗрибәсе бик кызыклы. Бу хакта бүген ТР Инвестицион үсеш агентлыгы җитәкчесе Талия Миңнуллина ТР Министрлар Кабинетында узган, ТР Президенты Рөстәм Миңнеханов җитәкчелегендәге Татарстан делегациясенең Япониягә, Кытайга һәм Төркиягә эшлекле сәфәрләре йомгакларына багышланган брифингта хәбәр итте. 
Брифингта шулай ук ТР сәнәгать һәм сәүдә министры урынбасары Илдар Мингалиев һәм ТР икътисад министры урынбасары Булат Хаҗиәхмәтов катнашты.

Искәртеп үтик: 4-5 октябрь көннәрендә Татарстан делегациясе Япониягә ике көнлек эш сәфәре кылды. Аның беренче көнендә ТР вәкилләре Киото шәһәрендә ел саен үткәрелә торган “Җәмгыятьтә фән һәм технологияләр” (Science and Technology in Society) халыкара форумында катнашты. Талия Миңнуллина билгеләп узганча, анда сәнәгать инновацияләре, робот техникасы, яңа җитештерү технологияләре, материаллары, нанотехнологияләргә багышланган мәсьәләләр турында фикер алышу уздырылган. Шактый дәрәҗәле саналган бу форумда Япония Премьер-министры Синдзо Абэ, Франция Премьер-министры Манюэль Вальс, Шри-Ланка Премьер-министры Ранил Викрамасингхе, Россия Премьер-министры урынбасары Аркадий Дворкович, “Роснано” башлыгы Анатолий Чубайс, шулай ук дөньяның 100дән артык иленнән алдынгы сәнәгать компанияләре, фәнни-тикшеренү үзәкләре җитәкчеләре, корпорацияләр һәм фирмалар башлыклары, дәүләт һәм хосусый фондлары җитәкчеләре – җәмгысе меңнән артык кеше катнашкан.

“Әлеге форум Татарстанга бик кызыклы. Ник дигәндә, ул республика өчен файдалы элемтәләр булдыруга менә дигән мөмкинлек булдыра. Быелгы чара моның шулай икәнлеген күрсәтте. ТР Президенты йөкләмәсе буенча киләсе елга Татарстанның бу форумда тагын да активрак катнашуы ниятләнә”, – диде ТР Инвестицион үсеш агентлыгы җитәкчесе.

Форум кысаларында ТР Президенты “Энергетика һәм әйләнә-тирә мохит” пленар утырышында, шулай ук РФ Хөкүмәте Рәисе урынбасары Аркадий Дворковичның Япония Премьер-министры Синдзо Абэ белән очрашуында катнашкан. Моннан тыш, Рөстәм Миңнеханов “Иокогава электрик” компаниясе президенты Нишиджима Такаши һәм Япониянең эшлекле даирәләре вәкилләре белән очрашып, үзара хезмәттәшлек турында фикер алышкан.

Япониягә эш сәфәренең икенче көне Токиода уздырылган. Анда икътисадны модернизацияләү буенча Россия-Япония консультатив советы утырышы булган. Утырышта ТР Президенты Рөстәм Миңнеханов та чыгыш ясаган. Моннан тыш, Япония башкаласында “Мицубиси Хэви Индастриз” һәм “Соджиц” компанияләре җитәкчеләре белән очрашу уздырылган. Талия Миңнуллина әлеге компанияләрнең Татарстан белән берлектә минераль ашламалар заводы төзүгә юнәлтелгән “Аммоний” проекты буенча эш алып баруын искәртеп үтте. Сәфәр кысаларында Татарстан делегациясе вәкилләре Токиодан ерак түгел урнашкан Фуджисава “акыллы” экологик шәһәрендә дә булганнар. “Татарстан Япониянең мондый “акыллы” шәһәр булдыру өлкәсендәге тәҗрибәсен “Иннополис” һәм “Смарт сити Казань” проектлары үсеше кысаларында файдаланырга ниятли”, – дип билгеләп үтте Талия Миңнуллина.

Брифингта катнашкан ТР Икътисад минисрлыгы җитәкчелеге вәкиле Булат Хаҗиәхмәтов, аерым алганда, ТР делегациясенең Токионың Джунтендо университетында симуляция үзәгендә булуы турында сөйләде.

“Япония һәм Татарстан мәгариф, сәламәтлек саклау, сәнәгать һ.б төрле өлкәләрдә хезмәттәшлек итә. Шулай да, Татарстан өчен Япониянең иң көчле ягы – аның технологияләре. Ник дигәндә, технологик яктан бу ил дөньяда бүген алдынгы урынны алып тора”, – дип ассызыклады Талия Миңнуллина.