10нчы мартка булган мәгълүматлар буенча Татарстанда рәсми рәвештә теркәлгән эшсезләр саны 68 мең кеше тәшкил итә

Татарстанда эше булган халык саны 1,9 млн. кеше тәшкил итә. Ул хакта бүген ТР Хөкүмәт Йортында узган брифингта хезмәт, эш белән тәэмин итү һәм социаль яклау министры урынбасары Клара Таҗетдинова хәбәр итте.

Брифинг республиканың хезмәт базарындагы вәзгыятькә багышланган иде. Ул видеоконференция тәртибендә узды. Чарада барлык муниципаль районнар да катнашты.

Клара Таҗетдинова җәмәгать эшләре һәм вакытлыча оештырылган эш урыннары нык ярдәм итте, дип белдерде.

Тулаем алганда республикада рәсми рәвештә теркәлгән эшсезләр саны арта. 2010 елның 1нче гыйнварына булган мәгълүматлар буенча аларның саны 58 мең кеше иде. Шуннан соң эшсезләр саны атна саен арта килде. 2010 елның 10нчы мартына булган мәгълүматлар буенча бу сан 68 мең граждан тәшкил итә.

ТР хезмәт, эш белән тәэмин итү һәм социаль яклау министры урынбасары язгы чорда эшсезләр санының артуы республиканың хезмәт базары өчен табигый күренеш булганын әйтте.

Ул шулай ук эшсезләр санының артуы, 2009 ел белән чагыштырганда, түбәнрәк икәнен билгеләп үтте. 2009 ел башында Татарстанда эшсезләр саны 25,8 мең кеше булган булса, 2009 елның май башында 68 мең кеше эшсез булган.

Эшсез гражданнар арасында үз теләкләре белән эштән китүчеләр дә бар. Эшсезләрнең өчтән бер өлеше - озак вакыт дәвамында (өч ел һәм өч елдан күбрәк) эшләми торган кешеләр.

Бүген бездә эш көченең легальләшүе күзәтелә, диде Клара Таҗетдинова, әлеге гражданнар элек тә эшсез иде, ләкин алар эшсезлекне теркәү буенча исемлеккә кермәгән булган.

Уртача алганда, Татарстан буенча эшсез гражданнар дәрәҗәсе икътисадый яктан актив булган халык нисбәтеннән 3,32% тәшкил итә.

Шул ук вакытта 26 муниципаль районда эшсезләр санының артуы күзәтелә (бигрәк тә эре шәһәрләрдә), 16 муниципаль районда исә эшсезләр саны кими бара.

Эшсезлекнең иң зур дәрәҗәсе Яр Чаллыда (6% тирәсе), Алабуга, Спас муниципаль районында һәм башка җирләрдә күзәтелә.

Моннан кала, Клара Таҗетдинова хәбәр иткәнчә, эшсезләрнең гомуми саныннан (68 мең кеше) 30 мең кешенең моношәһәрләрдә (Яр Чаллы, Кама Аланы, Баулы, Чистай, Яшел Үзән) яши икән.

Республикада 54 мең кеше тулы булмаган эш белән тәэмин ителгән. Шуларның 5 меңе - хезмәт хакы сакланмый торган ялда.

Клара Таҗетдинова 2010 ел бюджетында эшсезлек буенча пособиеләр күләме 1,5 млрд. сум тәшкил иткәнен әйтте. Пособиенең минималь күләме 850 сум, максималь күләме 4,9 мең сум тәшкил итә. Уртача алганда республика буенча пособие күләме 2,7 мең сум тәшкил итә.

Кризиска каршы юнәлтелгән чаралар программасын үтәүгә килгәндә, аның өчен Татарстанга бирелгән акча күләме 2009 ел дәрәҗәсендә сакланган, һәм ул 2,9 млрд. сум тәшкил итә (шуларның 2,775 млрд. сумы – федераль бюджеттан һәм 208 млн. сумы - ТР бюджетыннан).

Журналистлар сорауларына җавап биргәндә, ТР хезмәт, эш белән тәэмин итү һәм социаль яклау министры урынбасары Казанда эшсезләр саны 14,7 мең кеше тәшкил иткәнен әйтте. Татарстан башкаласында эшсезлек дәрәҗәсе 2,3% тәшкил итә. Шул ук вакытта хезмәт базарында 5,4 мең вакансия бар.