Татарстан Хөкүмәте Йортында 2013 ел Бөтендөнья җәйге универсиаданы массакүләм мәгълүмат чараларында яктырту мәсьәләләре турында сөйләштеләр

2013 ел Бөтендөнья җәйге универсиаданы массакүләм мәгълүмат чараларында яктырту мәсьәләләре буенча киңәшмәне бүген Татарстан Республикасы Премьер-министры Рөстәм Миңнеханов үткәрде.

Киңәшмәдә "Спортивное вещание" оешмасының эшлекле төркем әгъзалары, шул исәптән "Росмедиаком" дирекциясе һәм Бөтенроссия дәүләт телерадиокомпаниясе департаментлары вәкилләре катнашты.

Сүз берничә спорт объектын кирәкле җиһазлар һәм элемтә чаралары белән тәэмин итү һәм Универсиаданың халыкара матбугат үзәген оештыру турында барды.

Доклад белән матбугат һәм массакүләм коммуникацияләр буенча Республика агентлыгы җитәкчесе Марат Моратов чыгыш ясады.

2013 елның җәйге Уеннарына спорт объектларын әзерләү турында ТР яшьләр эшләре, спорт һәм туризм министры Марат Барыев сөйләде.

Ул Казанда узачак җәйге Универсиадага спорт төрләре моңарчы күренмәгән санда тәкъдим ителгәнен әйтте. Барлыгы 26 спорт төре тәкъдим ителгән (шуларның 13е - төп спорт төрләре һәм 13е - өстәмә). Универсиада кысаларында барлыгы 64 спорт корылмасы һәм Универсиада Авылы кулланылачак.

Спорт объектларының гомуми саныннан 28е инде бар яисә төзекләндерүгә мохтаҗ, 36сы төзелә (11 объект инде файдалануга тапшырылган).

Ярышлар өчен барлыгы 37 спорт мәйданы файдаланылачак (калган спорт корылмалары тренировкалар өчен файдаланылачак) .

Бүген кирәкле элемтә чаралары белән берничә генә объект тәэмин ителгән. Болар - Көрәш сарае, "Татнефть-Арена", "Баскет-Холл", чирәмдәге хоккей Үзәге һәм Үзәк стадион.

Белгечләр ярышларны трансляцияләү һәм сигналны тапшыру өчен кирәкле җиһазлар һәм телекоммуникацияләр белән тәэмин итү өчен кирәк булган проект документациясенең техник биремен инде әзерләгән.

ТВ-трансляцияләр 37 спорт мәйданыннан башкарылачак.

2013 ел Универсиадасының халыкара матбугат үзәген оештыру мәсьәләсенә килгәндә, бүген ике вариант бар: Мәскәү урамындагы Спорт сарае (Казанның 1000-еллыгы матбугат үзәге урнашкан бина) һәм Петербург урамындагы IT-парк бинасы.

2013 ел Универсиадасын массакүләм мәгълүмат чараларында яктырту мәсьәләләре буенча эшлекле төркем әгъзалары ике көндә һәр ике бинаны карап чыгып һәр икесенең мөмкинлекләрен дә тикшерер дип планлаштырыла.

ТР Премьер-министры Рөстәм Миңнеханов 2013 ел Универсиадасын массакүләм мәгълүмат чараларында яктырту эшләрен әзерләгән вакытта 2009 елда Сербиядә узган Универсиаданың хаталарын исәпкә алырга кирәк, диде. Ул шулай ук Кытайның Шеньжень шәһәре тәҗрибәсен өйрәнергә тәкъдим итте. Биредә Бөтендөнья җәйге спорт студент Уеннары 2011 елда узачак.

Кытай югары дәрәҗә күрсәтәчәк, диде Рөстәм Миңнеханов, без алардан соң чыгыш ясыйбыз, шуңа күрә без иң яхшылардан үрнәк алырга тиеш.