Татарстан Премьер-министры Рөстәм Миңнеханов: үзебезнең төзелеш оешмаларының эшли алу сәләте һәм профессионализмы безнең өчен бик мөһим

Югары профессиональ төзүчеләрдән башка Татарстан икътисады яши алмый. Ул хакта бүген "Татарстан Республикасы төзүчеләр берлеге" төбәк коммерцияле булмаган партнерлык оешмасының еллык җыелышында ТР Премьер-министры Рөстәм Миңнеханов белдерде.

Хисап тоту җыелышы "Корстон" мәдәни күңел ачу комплексында узды. Бу, оешма барлыкка килгәннән соң, беренче шундый җыелыш.

Җыелышта катнашучылар алдында чыгыш ясаганда, ТР Хөкүмәте башлыгы "ТР төзүчеләр берлеге"нең эше декларатив рәвештә генә булмаячагына ышанганын белдерде. Аның сүзләренчә, әлеге оешма инде бүген үк төзелеш өлкәсен тәртипкә китерергә ярдәм итә, белгечләрнең белем дәрәҗәсен күтәрә.

Үзеннән үзе идарә ителә торган оешма булуы төзүчеләр өчен әйбәт, дип саный Рөстәм Миңнеханов. Барлык инженер, төзелеш һәм проект оешмаларын үзеннән үзе идарә ителә торган оешмаларга кертү турындагы федераль закон барлыкка килгәч, без республикада мондый структураның һичшиксез төзеләчәген белдердек, дип искә төшерде ТР Премьер-министры.

Ул шулай ук "ТР төзүчеләр берлеге" җитәкчеләрен дөрес сайлаганын әйтте - аның эш тәртибен белүе, республиканы белүе һәм оештыру сәләте тормышка сәләтле структураны кыска гына вакыт эчендә төзергә ярдәм итте.

Рөстәм Миңнеханов шулай ук бүген күп кенә эре төзелеш проектларының үзебезнең белгечләр тарафыннан тормышка ашырылганын әйтте (мисал итеп ул "ТАНЕКО" ААҖ проектын - Түбән Камада нефтехимия һәм нефть эшкәртү заводлары Комплексының төзелешен китерде). Әлеге объектларның төзелеш сыйфатында шигебез юк, диде ул.

Моннан кала, республикада эре спорт корылмалары да төзелә. Бу 2013 елда Казанда узачак Универсиадага әзерлек кысаларында башкарыла. Шулай ук, капиталь ремонт программасы үтәлә, торак төзелә. Болар барысы да кече һәм урта компанияләргә эш табарга мөмкинлек бирә, дип билгеләп үтте Рөстәм Миңнеханов.

Республика төзелеш материалларына кытлык кичерми, диде ТР Хөкүмәте башлыгы. Бүген без планга кертелгән һәм планга кертелмәгән төзелеш объектларын үзләштерә алабыз. Ул шулай ук республикага төзелеш оешмаларының конкурентлык сәләте һәм профессионализмы артуы кирәк, диде.

Рөстәм Миңнеханов "ТР төзүчеләр берлеге"нә киләсе елда әгъзаларының икеләтә артуын теләде.

Ул шулай ук "ТР төзүчеләр берлеге" президенты Рим Халитов белән очрашу вакытында оешма өчен аерым бина төзү турындагы мәсьәлә каралганын әйтте. ТР Премьер-министры "ТР төзүчеләр берлеге" өчен бина төзелеше карарын хуплады. Төзелеш өчен мәйданчык инде табылган.

2009 елда эшләнгән эшләргә хисап тотып доклад белән "ТР төзүчеләр берлеге" президенты Рим Халитов чыгыш ясады.

Ул "ТР төзүчеләр берлеге"нә керү өчен төзелеш компанияләреннән 1441 гариза тапшырылганын хәбәр итте. Шуларның 1230ы карала.

Партнерлык советы төзелеш эшләрен алып барырга рөхсәт бирә торган 877 шаһәдәтнамә биргән. "ТР төзүчеләр берлеге"нә кергән оешмаларда барлыгы 98 745 кеше эшли.

Яңа бина төзелешенә килгәндә, ул "ТР төзүчеләр берлеге" әгъзалары хисабына төзеләчәк.

Җыелышта "Камгэсэнергострой" ААҖ генераль директоры Александр Евдокимов, "Прогресс-Жилстрой" ҖЧҖ директоры Ринат Батталов, "Татнефть" ААҖнең капиталь төзелеш идарәсе башлыгы Николай Глазков, "Дизайнстройцентр" ҖЧҖ директоры Александр Баширов һәм башкалар чыгыш ясады.