Илдар Халиков: Татарстан һәм Куба хезмәттәшлеге өчен бөтен көчне кулланырга кирәк

Татарстан Республикасы Премьер-министры Илдар Халиков һәм Куба Министрлар Советы рәисе Рикардо Кабрисас бүген очрашуда Татарстан Республикасы һәм Куба Республикасының киләчәктәге хезмәттәшлеге мәсьәләләре хакында фикер алыштылар.
Очрашу Куба Хөкүмәте бинасында узды.

Илдар Халиков Кабрисас әфәндегә Татарстан Республикасы Президенты Рөстәм Миңнехановның сәламләү сүзләрен тапшырды һәм бу очрашуны оештырган өчен рәхмәт белдерде.

Куба Татарстан өчен мөһим икътисади партнер булып тора, - дип белдерде Илдар Халиков. Ул Россия Президенты Владимир Путин тарафыннан Куба белән хезмәттәшлекне киңәйтү турында бурыч куелганын искә төшерде.

Очрашу барышында ике яктан да катнашучылар “КАМАЗ” һәм “Казан вертолет заводы” ҖАҖ продукцияләре белән тәэмин итүне киңәйтү, мәгълүматлаштыру, фармацевтика һәм медицина, туризм өлкәләрендәге хезмәттәшлек мәсьәләләре хакында фикер алыштылар.

Үз чиратында, Рикардо Кабрисас хәбәр иткәнчә, Куба Хөкүмәте мәгълүматлаштыру өлкәсендә, шул исәптән “Электрон Хөкүмәт” проекты буенча Татарстанның алдынгы тәҗрибәсе белән кызыксына.

ТР Премьер-министры шулай ук нефтехимия, медицина һәм сәламәтлек саклау, мәгариф өлкәләрендә хезмәттәшлекне үстерүне тәкъдим итте.

Очрашуда Куба ягыннан сәнәгать, элемтә, танспорт, тышкы сәүдә, икътисад һәм планлаштыру министрлыклары вәкилләре катнашты.
Татарстан делегациясе составында ТР Сәнәгать һәм сәүдә, ТР Сәламәтлек саклау, ТР Транспорт һәм юл хуҗалыгы министрлыклары, ТР Инвестицион үсеш агентлыгы, Экспорт корпорациясе, “Татхимфармпрепарат”, “КАМАЗ” һәм “Казан вертолет заводы” ҖАҖләре вәкилләре бар иде.