2015 елга “Радиоприбор” ААҖ (Казан), “Әлмәт заводы “Радиоприбор” ААҖ һәм “Казан электротехника заводы” ААҖ җитештерү күләмнәрен өч тапкыр арртырачак

2015 елга “Радиоприбор” ААҖ (Казан), “Әлмәт заводы “Радиоприбор” ААҖ һәм “Казан электротехника заводы” ААҖ җитештерү күләмнәрен өч тапкыр арртырачак.

Мондый максат әлеге предприятиеләрне үстерү, заказлар белән тәэмин итү һәм заманчалаштыру программасы кысаларында куелган.

Исегезгә төшерәбез: “Радиоприбор” ААҖ (Казан), “Әлмәт заводы “Радиоприбор” ААҖ һәм “Казан электротехника заводы” ААҖ өчен “Ростехнологияләр” дәүләт корпорациясе ике программа эшләгән.

Беренчесе - “Радиоприбор” ААҖ (Казан), “Әлмәт заводы “Радиоприбор” ААҖ һәм “Казан электротехника заводы” ААҖн үстерү, заказлар белән тәэмин итү һәм заманчалаштыру Программасы. Аны “Ростехнологияләр” дәүләт корпорациясенең “Радиоэлектрон технологияләр” Концерны әзерләгән.

Икенчесе - “Радиоприбор” ААҖ (Казан), “Әлмәт заводы “Радиоприбор” ААҖ һәм “Казан электротехника заводы” ААҖн 2010-2015 елларда үстерү һәм заказлар белән тәэмин итү Программасы. Аны “Ростехнологияләр” дәүләт корпорациясенең “Авиаприборостроение” концерны әзерләгән.

Бүген ике документка да ТР Хөкүмәте Йортында ТР Премьер-министры Рөстәм Миңнеханов һәм “Концерн “Авиаприборостроение” ААҖ генераль директоры Андрей Тюлин белән “Концерн “Радиоэлектронные технологии” ААҖ җитәкчесе Николай Колесов тарафыннан кул куелды.

Очрашудан соң Андрей Тюлин хәбәр иткәнчә, һәр ике программа да биш елга исәпләнгән. Аның сүзләренчә, предприятиеләрдәге җитештерү күләменең кимүе “хуҗалар аркасында да, килеп туган вәзгыять аркасында да, ягъни концерн формалашу нәтиҗәсендә күзәтелгән”. Бүгенге максат исә - 2015 елга җитештерү күләмнәрен өч тапкыр арттыру.

Андрей Тюлин хәзерге вакытта предприятиеләрдә яңа продукция җитештерү өчен кирәкле техник документация алу эшләре барганын билгеләп үтте. Шулай ук, аның сүзләренчә, предприятиеләрдә шактый киң диверсификация көтелә - халык хуҗалыгы өчен дә, очкыч-вертолетлар өчен дә җиһазлар җитештереләчәк.

Николай Колесов үз чиратында предприятиеләрдәге вәзгыятьнең яхшы якка үзгәрүен 2011 елның уртасында-азагында күрергә мөмкин булачак, диде. “Хәзерге вакытта көн кадагында торган мәсьәлә - предприятиеләрне техник яктан яңарту, серияле җитештерүгә әзерләү”, - диде ул.

Николай Колесов предприятиеләрне техник яктан яңарту Программасы кысаларында 700 млн. сум тирәсе акча бүленеп бирелгәнен әйтте. Бу Татарстан Республикасы, Россиянең сәнәгать һәм сәүдә министрлыгы, “Ростехнологияләр” дәүләт корпорациясе һәм башка чыганаклардан килгән акчалар.

“Боларның барысы да программада чагылыш тапкан. Әлеге акча предприятиеләрне үстерү өчен этәргеч булыр, дип өметләнәбез”, - диде Николай Колесов.

ТР сәнәгать һәм сәүдә министры Равил Зарипов “бүген әлеге предприятиеләрнең еллык җитештерү күләме 800 млн. сум тәшкил итә, 2015 елга алар 3 млрд. 800 млн. сумга җитәчәк, дип планлаштырабыз”, дип белдерде.

“Без предприятиеләрне сәламәтләндерү мәсьәләсен дә карадык, - диде Равил Зарипов. – Бу комплекслы мәсьәлә. Федераль үзәкнең дә, “Ростехнологияләр” дәүләт корпорациясенең ярдәме дә кирәк. Әлбәттә, җитәкчелек корпусының да эше бик мөһим”.