Татарстанда сәламәтлек саклау, мәдәният, социаль яклау, яшьләр һәм спорт учреждениеләре автотехниканың 100 яңа берәмлеген алды

Бүген Татарстан Республикасы Премьер-министры Рөстәм Миңнеханов Татарстан Республикасы сәламәтлек саклау, мәдәният, социаль яклау, яшьләр һәм спорт учреждениеләре вәкилләренә 100 яңа автомашинадан ачкычлар тапшырды.

Ачкычларны тапшыру тантанасы “Казан” милли мәдәният үзәге каршындагы мәйданда узды.

Автомашиналарның барысы да Татарстан территориясендә, Россия Федерациясе Хөкүмәте, РФ төбәкләр үсеше министрлыгы һәм Татарстан Республикасы арасында төзелгән автотранспорт чараларын һәм коммуналь техниканы сатып алу турындагы килешү кысаларында җитештерелгән.

Бер яктан, төбәк бюджетлары финанс ярдәм күрсәтә торган әлеге федераль программа тоткарланган икътисадый үсеш шартларында автомобиль сәнәгатенә ярдәм итә, икенче яктан, ул учреждение һәм оешмаларның автотранспорт чаралары паркын яңартырга мөмкинлек бирә.

ТР мәдәният министрлыгы 35 автомашинадан ачкыч алды (шул исәптән, FIAT Ducato маркалы 25 микроавтобустан һәм FIAT Albea маркалы 10 җиңел машинадан).

ТР сәламәтлек саклау министрлыгының паркы 17 яңа машина белән тулыланды (шул исәптән, 2 яңа “НЕФАЗ” автобусы һәм 15 FIAT Ducato микроавтобусы белән).

ТР хезмәт, эш белән тәэмин итү һәм социаль яклау министрлыгы 25 FIAT Ducato микроавтобусы, ТР яшьләр эшләре, спорт һәм туристлык министрлыгы 23 FIAT Ducato микроавтобусы алды.

“Бүген без узган елны Россия Федерациясе Хөкүмәте тарафыннан эшләнгән муниципаль һәм дәүләт ихтыяҗлары өчен кирәкле транспорт чараларын бүлеп бирү турындагы программаны төгәллибез, - диде ТР Премьер-министры Рөстәм Миңнеханов. – Без дә әлеге программаны тормышка ашыруда катнаштык. Тулаем алганда, республика төрле маркадагы 1089 автомобиль алды. Шунысы мөһим: аларның барысы да Татарстан Республикасында эшләнгән”.

Рөстәм Миңнеханов сүзләренчә, финанс кризисы булуга карамастан, республикада министрлыкларның мадди-техник базасын ныгыту өчен күп эшләр башкарыла. Бу автомобильләргә ихтыяҗ чыннан да зур.

Татарстан Хөкүмәте башлыгы федераль программа 2010 елда да эшен дәвам итәчәк һәм республика яңадан әлеге программада катнашачак, дигән өметтә торганын әйтте.

Ул автомобильләргә сакчыл мөнәсәбәттә булырга чакырды. Алар республика халкына әйбәтләп хезмәт итәрлек булсын.

ТР мәдәният министры Зилә Вәлиева 2009 елның декабрендә ТР мәдәният министрлыгы алган автомашиналар “шулкадәр эффектив рәвештә эшлиләр ки, республикадагы иң өлкән Әтнә халык театры инде гастрольләр белән Оренбург һәм Самарада булып кайтырга өлгергән” дип әйтте. Аның сүзләренчә, яңа транспорт чаралары шәһәрләр һәм районнар арасындагы мәдәни элемтәләрне ныгытырга ярдәм итә.

“Яңа автомашиналар мәдәният хезмәткәрләренә Россиядә һәм чит илләрдә үткәрелә торган фестивальләргә йөрергә мөмкинлек бирә, - диде Зилә Вәлиева. – Республикада мәдәният өлкәсенә җитди ярдәм күрсәтелә. Шул рәвешле без миллионлаган тамашачыбыз, укучыбыз һәм музейга йөрергә яратучыларга ярдәм итәбез”.