Татарстан Республикасы Министрлар Кабинеты һәм “Майкрософт Рус” ҖЧҖ арасында үзара хезмәттәшлек турында Килешүгә кул куелды

Бүген Татарстан Республикасы Министрлар Кабинеты һәм “Майкрософт Рус” ҖЧҖ арасында үзара хезмәттәшлек турында Килешүгә кул куелды. Документны ТР Хөкүмәте башлыгы Рөстәм Миңнеханов һәм “Майкрософт Рус” ҖЧҖ президенты Николай Прянишников имзалады.

Килешү буенча Татарстан Республикасы белән үзәкләштерелгән лицензияләштерелгән килешүнең эшчәнлеген озынайту каралган. Ул өч ел дәвамында гамәлдә булачак һәм Microsoft продуктларын һәм технологияләрен кулланып Татарстан дәүләт хакимияте органнарының эшен тагы да камилләштерергә ярдәм итәчәк. Бу “Татарстан Республикасы Электрон Хөкүмәте” проектын тормышка ашыруда чираттагы адым да.

Документ ТР Премьер-министры Рөстәм Миңнехановның Microsoft компаниясенең Үзәк һәм Көнчыгыш Европадагы вице-президенты Вахе Тороссян белән очрашу вакытында имзаланды.

Вахе Тороссян Татарстан Республикасының компания үзара хезмәттәшлек турында килешү төзегән беренче төбәк булганын искә төшерде. Бу 2006 елда булды. Бүген мондый килешүләр башка төбәкләр белән дә төзелгән, ләкин, Вахе Тороссян белдерүенчә, Татарстан мәгълүмати технологияләрне куллану һәм гамәлгә кертү буенча “беренче номер” булып кала.

Microsoft компаниясенең Үзәк һәм Көнчыгыш Европадагы вице-президенты Вахе Тороссян Ленин ис. Казан дәүләт университетына да барып кайтканын, шулай ук, студентлар белән аралашканын һәм IT-паркның яңа бинасын караганын әйтте. Аның сүзләренчә, Казандагы офис, бәлки, IT-парк территориясенә күченәчәк.

Вахе Тороссян Татарстанның барлык укытучыларны да нетбуклар белән тәэмин итү дигән ниятен хуплады.

ТР Премьер-министры Рөстәм Миңнеханов, үз чиратында, Татарстанның IT-технологияләр өлкәсендәге IDA Internatoinal компаниясе (Сингапур) белән хезмәттәшлеге турында сөйләде.

“Без Microsoft компаниясе белән мөнәсәбәтләр өчен ныклы нигез салдык, - диде ул. – Шушы нигезне саклап, яңа дәрәҗәгә чыгу мөһим”.

Очрашуда ТР мәгълүматлаштыру һәм элемтә министры Фәрит Фазылҗанов, ТР Министрлар Кабинеты каршындагы мәгълүмати технологияләр Үзәге генераль директоры Николай Никифоров катнашты.

Очрашудан соң Microsoft компаниясенең Үзәк һәм Көнчыгыш Европадагы вице-президенты Вахе Тороссян һәм “Майкрософт Рус” ҖЧҖ президенты Николай Прянишников журналистлар сорауларына җавап бирде.