Татарстан Премьер-министры Рөстәм Миңнеханов ТР Хөкүмәте Йортында Төрекмәнстан Мәҗлесе рәисе Акҗа Нурбердыеваны кабул итте

Бүген Татарстан Премьер-министры Рөстәм Миңнеханов ТР Хөкүмәте Йортында Төрекмәнстан Мәҗлесе (Парламенты) рәисе Акҗа Нурбердыеваны кабул итте.

Төрекмәнстан белән Татарстанны ныклы һәм күптәнге сәүдә, икътисадый һәм мәдәни мөнәсәбәтләр бәйли.

Әңгәмә барышында ТР Премьер-министры Рөстәм Миңнеханов Төрекмәнстанның Татарстан белән хезмәттәшлеге тигез рәвештә үсүен билгеләп үтте. Аның сүзләренчә, бүген Төрекмәнстанда мәгариф, сәламәтлек саклау, туристлык үсешенә аеруча зур игътибар бирелә. Ул Хәзәр диңгезендәге "Аваза" милли туристлык зонасы киләчәктә "туристлык Мәккәсе"нә әверелә ала, дип әйтте: биредәге сыйфат, бәя һәм күрсәтелә торган хезмәтләрнең югары дәрәҗәсе моңа этәргеч булачак.

Безгә фән, мәгариф, мәдәният өлкәләрендәге мөнәсәбәтләрне үстерергә кирәк, диде Рөстәм Миңнеханов, чөнки без - кардәш халыклар. Аның сүзләренчә, Төрекмәнстан белән Татарстанны тел, мәдәният, дин бәйли. Уртак эшләр икътисадны үстергән очракта гына уңышлы булачак, дип билгеләп үтте ул, уртак бизнесны оештырырга, Татарстан белән Төрекмәнстан арасындагы сәүдә әйләнешен арттырырга кирәк.

Рөстәм Миңнеханов, шулай ук, 2010 елның февралендә Ашхабадта Россия Федерациясе Татарстан Республикасының Тулывәкаләтле вәкиллеге ачылганын искә төшерде. Бу Төрекмәнстан һәм Татарстан арасындагы фән һәм мәдәният өлкәләрендәге багланышларны һәм икътисадый хезмәттәшлекне ныгыту максаты белән башкарылды.

Ул Төрекмәнстанның Россия Федерациясендәге вәкиленә күрсәткән ярдәме өчен рәхмәтен җиткерде.

Төрекмәнстан Мәҗлесе (Парламенты) рәисе Акҗа Нурбердыева Рөстәм Миңнехановка Төрекмәнстан Президенты Гурбангулы Бердымөхәммәдовның ТР Президенты вазыйфасына керешү уңаеннан котлавын җиткерде.

Очрашуда, шулай ук, Төрекмәнстанның мәдәният һәм телерадиотапшырулар министры Гөлморад Морадов, ә Татарстан Республикасы ягыннан ТР мәдәният министры Зилә Вәлиева катнашты.