Рөстәм Миңнеханов рәсми рәвештә Татарстан Республикасы Президенты вазыйфасына кереште

Бүген Рөстәм Миңнеханов рәсми рәвештә Татарстан Республикасы Президенты вазыйфасына кереште.

Вазыйфага керешү тантанасы Татарстан башкаласы Казанда, Сәйдәшев ис. Зур концерт залында узды.

Тантанада Татарстан Республикасының беренче Президенты Минтимер Шәймиев, Россия Президентының Идел буе федераль округындагы тулывәкаләтле вәкиле Григорий Рапота, Россия Дәүләт Думасының беренче вице-спикеры Олег Морозов, Ислам Конференциясе Оешмасы генераль сәркатибе Әкмаледдин Ихсаноглы, Төрекмәнстан, Казахстан, шулай ук, Согуд Гарәбстаны, Сингапур, Төркия, Иран делегацияләре дә катнашты.

Татарстан Президенты вазыйфасына керешү тантанасына барлыгы 800ләп кунак килде.

Чараны ТР Дәүләт Советы рәисе Фәрид Мөхәммәтшин ачып җибәрде.

Ул 2010 елның 4нче февралендә дүртенче чакырылыш ТР Дәүләт Советының сигезенче утырышында республика парламенты депутатлары Рөстәм Миңнехановка Татарстан Республикасы Президенты вәкаләтләрен тапшырганын искә төшерде.

Элегрәк ТР Премьер-министры Рөстәм Миңнеханов кандидатурасы "Бердәм Россия" фиркасе һәм РФ Президенты Дмитрий Медведев тарафыннан каралган иде.

Татарстанның беренче Президенты Минтимер Шәймиев Рөстәм Миңнехановка Президент штандартын тапшырды.

Рөстәм Миңнеханов кулын Конституциягә куеп ант текстын укыды.

"Татарстан Республикасы халкына тугрылыклы итеп хезмәт итәргә, гражданнарның хокукларын, Татарстан Республикасы дәүләт суверенлыгын сакларга, Россия Федерациясе Конституциясен, Татарстан Республикасы Конституциясен һәм Татарстан Республикасы кануннарын үтәргә, миңа тапшырылган Татарстан Республикасы Президенты вазыйфасын үтәргә тантаналы рәвештә ант итәм".

Татарстан Республикасы Президенты Рөстәм Миңнеханов адресына котлаулар белән Минтимер Шәймиев, РФ Президентының Идел буе федераль округындагы тулывәкаләтле вәкиле Григорий Рапота, Ислам Конференциясе Оешмасы генераль сәркатибе Әкмаледдин Ихсаноглы һәм башкалар чыгыш ясады.