Татарстан Республикасы Хөкүмәте

Рөстәм Миңнеханов Түбән Камада "Нефтехимик" футбол клубының укыту-тренировка базасында булды

2015 елның 11 ноябре, чәршәмбе

Бүген Түбән Камага эш сәфәре кысаларында Татарстан Республикасы Президенты Рөстәм Миңнеханов "Нефтехимик" футбол клубының укыту-тренировка базасында булды. Биредә аны "Нетехимик" ФК президенты Тимур Шиһабетдинов һәм "Нефтехимик" ФК директоры Наил Гыйззәтуллин каршы алдылар.

Рөстәм Миңнеханов визитының төп максаты - клуб инфраструктурасы белән танышу.

Футбол клубы базасы территорисендә күптән түгел төзекләндерү эшләре тәмамланды. Бүген "Нефтехимик" ФК Татарстан футболы үсешендә мөһим роль уйный, "Рубин" футбол клубы уенчылары алга таба чыгыш ясар өчен Түбән Кама командасында тәҗрибә туплыйлар.

Рөстәм Миңнеханов укыту-тренировка базасында җәй көне тәмамланган төзекләндерүне уңай бәяләде.

Шуннан Татарстан Президенты клубның алга таба планнары һәм үсеше мәсьәләләре буенча кыскача киңәшмә үткәрде. Киңәшмәдә "ТАИФ" ААҖ генераль директоры Альберт Шиһабетдинов, Казан мэры һәм "Рубин" ФК президенты Илсур Метшин, Түбән Кама мэры Айдар Метшин һәм "Нефтехимик" ФК президенты Тимур Шиһабетдинов катнаштылар. Аерым алганда, "Нефтехимик" ФК инфраструктурасын үстерү мөмкинлекләре турында сүз барды.

ТР Президенты Матбугат хезмәте. "Нефтехимик" ФК рәсми сайты материаллары файдаланылды

БАРЛЫК ЯҢАЛЫКЛАРНЫ УКУ