Рөстәм Миңнеханов "Татнефть" ААҖ директорлар Советы утырышын үткәрде

Бүген Татарстан Республикасы Президенты, "Татнефть" ААҖ директорлар Советы рәисе Рөстәм Миңнеханов "Татнефть" ААҖ директорлар Советының чираттагы утырышын үткәрде. Утырыш Татарстан Республикасы Хөкүмәте Йорты бинасында узды. Утырыш барышында гыйнвар һәм февраль айларында компания бюджеты үтәлеше нәтиҗәләре ясалды, 2010 елның апреленә һәм икенче кварталына бюджет расланды, "Татнефть" ААҖнең 2009 елдагы финанс-хуҗалык эшчәнлеге нәтиҗәләре һәм кризиска каршы чаралар Программасының үтәлеше каралды.

2009 елда 25 млн. 850,4 мең тонна нефть табылган. Бу 2008 ел күрсәткече белән чагыштырганда, 84,3 мең тоннага күбрәк.

280 нефть табу скважинасы гамәлгә кертелгән, алар ярдәмендә 422,6 мең тонна нефть табылган.

Хисап чорында Татарстан Республикасыннан читтә урнашкан 23 яңа скважина борауланган.

Сүриядә нефтьнең яңа чыганагы ачылган.

Ливиядә 2 тәҗрибә скважинасы борауланган. Беренчесен сынап караганда, нефть агымы тәүлегенә 103 куб. м тәшкил иткән. Икенчесендә әлеге сан тәүлегенә 130 куб. метрга җиткән.

Финанс-хуҗалык эшчәнлеге нәтиҗәләре буенча 67,9 млрд. сум керем алынган. Бу узган ел белән чагыштырганда, 18 млрд. cумга күбрәк. Барлык дәрәҗә бюджетларга түләнгән салымнар күләме 175,7 млрд. сум тәшкил иткән. Татарстан Республикасының консолидацияләнгән бюджетына тапшырылган салым күләме 21,7 млрд. сум тәшкил иткән. Бу 2008 ел белән чагыштырганда, 12%ка күбрәк.

"ТАНЕКО" нефть эшкәртү һәм нефтехимия заводлары Комплексы төзелешен исәпкә алганда, "Татнефть" компанияләр төркеме буенча инвестицияләрнең гомуми күләме 104,3 млрд. сум тәшкил иткән. Бу узган ел белән чагыштырганда, 32,3 млрд. сумга күбрәк.

Ил икътисадының кризистан чыгу шартларында 2010 елда "Татнефть" җитештерү үтемлегеген арттыру өстендә эшләрне дәвам итә.

Утырышта шулай ук "Татнефть" ААҖндә яңа технологияләр куллану турында да мәгълүмат тыңланды.

"Татнефть" ААҖң төп максаты - нефть табу эшендә яңа алдынгы технологияләр кертү. Бу бораулау, чыганаклардан файдалану, скважиналарны капиталь ремонтлау, нефть күләмен арттыру ысулларына кагыла.

Кече диаметрдагы скважиналарны бораулау кебек яңа технологияләр зур уңыш белән гамәлгә кертелә.

Компаниядәге яңа скважиналарның 95%ы коллекторлык сыйфатларын саклау буенча яңа технологияләр кулланып бораулана.

Директорлар Советы "Татнефть" ААҖ эшчәнлегенә кагылышлы башка мәсьәләләрне дә карады.