Татарстан Республикасы Президенты Рөстәм Миңнехановка максатчан программаларны исәпкә алу буенча дәүләт автоматлаштырылган системасын һәм капитал салулар программасын формалаштыру һәм аны күзәтү буенча мәгълүмати-аналитик системаны тәкъдим иттеләр

Бүген Татарстан Республикасы Президенты Рөстәм Миңнехановка ике автоматлаштырылган системаны тәкъдим иттеләр.

Киңәшмә ТР Хөкүмәте Йортында узды.

ТР икътисад министры вазифаларын башкаручы Марат Сафиуллин максатчан программаларны исәпкә алу буенча дәүләт автоматлаштырылган системасын һәм капитал салулар программасын формалаштыру һәм аны күзәтү буенча мәгълүмати-аналитик системаны тәкъдим итте.

Аның сүзләренчә, әлеге системаларны кабул итү белән "республикада идарә итү эшләре яңа дәрәҗәгә чыга алачак".

Максатчан программаларны исәпкә алу буенча дәүләт автоматлаштырылган системасы өч ел дәвамында эшләнде. Марат Сафиуллин Россия Федерациясендә мондый программаларның әле булмаганын билгеләп үтте.

Механизм теге яки бу максатчан программаның никадәр үтемле итеп эшләвен, аны кайчан туктатырга кирәклеген, программа эшчәнлегенең төп параметларын үзе билгели.

Максатчан программаларны исәпкә алу буенча дәүләт автоматлаштырылган системасы бюджет чыгымнары, программалар белән идарә итү, аларны күзәтү, контрольдә тоту мәсьәләләрен чишәргә мөмкинлек бирә.

Татарстан Президенты Рөстәм Миңнеханов максатчан программаларны исәпкә алу буенча дәүләт автоматлаштырылган системасын республика министрлыкларында гамәлгә кертүне хуплады. "Бәлки, бу система камил түгелдер, - диде ул. - Ләкин ул министрлыкларда эшли башлагач, без аны шомартачакбыз".

ТР Президенты максатчан программаларны исәпкә алу буенча дәүләт автоматлаштырылган системасын һәм капитал салулар программасын формалаштыру һәм аны күзәтү буенча мәгълүмати-аналитик системаны гамәлгә кертү турындагы мәгълүматны барлык министрлыкларга да җиткерергә тәкъдим итте. Әлеге системалар иң элек ТР төзелеш, архитектура һәм торак-коммуналь хуҗалыгы министрлыгы һәм ТР Министрлар Кабинеты каршындагы Мәгълүмати технологияләр үзәгендә сыналачак.

ТР Президенты Рөстәм Миңнеханов боерыгы буенча, министрлыкларда белгечләр өчен укыту семинарлары оештырылачак.