Татарстан Президенты "Алабуга" махсус икътисадый зонасы үсеше мәсьәләләре буенча киңәшмә үткәрде

Бүген Татарстан Республикасы Президенты Рөстәм Миңнеханов "Алабуга" махсус икътисадый зонасы үсеше мәсьәләләре буенча киңәшмә үткәрде.

Киңәшмә "Алабуга" махсус икътисадый зонасының административ-эшлекле үзәк бинасында узды. Чарада ТР төзелеш, архитектура һәм торак-коммуналь хуҗалыгы министры вазифаларын башкаручы Марат Хөснуллин, ТР кече һәм урта эшкуарлыкны үстерү буенча Комитет рәисе вазифаларын башкаручы Тимур Шаһивәлиев, "Алабуга" махсус икътисадый зонасы генераль директоры Василий Кудряшов һәм башкалар катнашты.

Киңәшмәдә "Алабуга" махсус икътисадый зонасының эш нәтиҗәләре ясалды, 2010 елга объектларны финанслау һәм төзү мәсьәләсе каралды.

Василий Кудряшов хәбәр итүенчә, 2010 елның 1нче апреленә биредә 9,9 млрд. сум акча үзләштерелгән. Төзелеш дәвамында исә барлыгы 10 млрд. сум тирәсе акча тотылган. 38 объект файдалануга тапшырылган, "Алабуга" махсус икътисадый зонасы резидентлары бөтен кирәкле инфраструктура белән дә тәэмин ителгән.

2010 елның төп максаты - "Алабуга" махсус икътисадый зонасында 13 объект төзү.

Моннан кала, 2010 елда "Алабуга" махсус икътисадый зонасында инфраструктура объектларының беренче чиратын сафка бастыру каралган. Әлеге объектларга инженер челтәрләре, юллар төзелеше һ.б. керә.

Күп кенә эре потенциаль резидентлар җитештерү мәйданнарын "Алабуга" махсус икътисадый зонасының икенче чиратында урнаштырырга тели. Шуңа күрә "Алабуга" махсус икътисадый зонасының икенче чиратын төзү эшләрен 2010 елда башлау каралган.