Татарстан Президенты Рөстәм Миңнехановка VIII Бөтенроссия авыл спорт уеннарын үткәрүгә Алабуга инфраструктурасының әзерлеге турында җиткерелде

VIII Бөтенроссия авыл спорт уеннарын үткәрүгә Алабуга инфраструктурасының әзерлеге турында бүген Татарстан Республикасы Президенты Рөстәм Миңнехановка җиткерделәр.

Киңәшмә ТР Хөкүмәте Йортында узды. Әлеге киңәшмәдә ТР яшьләр эшләре, спорт һәм туристлык министры вазифаларын башкаручы Марат Барыев, ТР финанслар министры вазифаларын башкаручы Радик Гайзатуллин, ТР авыл хуҗалыгы һәм азык-төлек министры вазифаларын башкаручы Марат Әхмәтов һ.б. затлар катнашты.

Вәзгыять турында Алабуга башкарма комитеты җитәкчесе Фәрит Хәнифов сөйләде.

Алабуганың авыл уеннарын үткәрүгә әзерлеге буенча соңгы киңәшмә 22нче февральдә үткәрелгән иде. Аны да Рөстәм Миңнеханов үткәрде.

Бүгенге көндә уеннарны үткәрү программасы федераль инстанцияләр белән тулысынча килешенгән.

Кунакларны һәм катнашучыларны кабул итү өчен шифаханәләр, балалар сәламәтләндерү лагерьлары (550 урын), тулай-тораклар (2100 урын), кунакханәләр (800 урын), шулай ук, ике теплоход файдаланылачак. Чарага 3 меңнән артык кеше килер дип көтелә.

Исегезгә төшерәбез: VIII Бөтенроссия җәйге авыл спорт уеннары Алабугада 2010 елның 8-13нче июлендә узачак.

Уеннар федераль, республика һәм җирле бюджетлардан, шулай ук, башка чыганаклардан финанслана.

Уеннарда катнашучыларның ялы өчен шәһәрнең үзәк мәйданы – Икмәк мәйданы файдаланылачак. Биредә фестиваль шәһәрчеген кору каралган. Кунаклар һәм спортчылар өчен Алабуга, Яр Чаллы, Түбән Кама һ.б. шәһәрләрнең иҗат коллективлары чыгыш ясаячак.

Шулай ук, ат чабышлары, трактор тамашасы (әлеге чарада иганәчеләр дә катнашачак), авыл хуҗалыгы техникасы күргәзмәсе кебек чаралар да көтелә.

VIII Бөтенроссия җәйге авыл спорт уеннарын үткәрүдә Алабуга волонтерлары катнашачак. Барлыгы – 200дән артык кеше. Моннан кала, Рөстәм Миңнеханов Казан дәүләт аграр университеты һәм Казан дәүләт ветеринария медицинасы академиясе студентларыннан да волонтерлар төркемнәрен оештырырга тәкъдим итте.

ТР яшьләр эшләре, спорт һәм туристлык министры вазифаларын башкаручы Марат Барыев спорт корылмаларының әзерлеге турында сөйләде. Уеннар 16 объектта узачак. Шуларның җидесендә ремонт һәм тиешенчә җиһазландыру эшләрен үткәрергә кирәк. Бу – үзәк стадион (биредә уеннарны ачу һәм ябу тантаналары һәм ярышларның бер өлеше узачак), әзерләнү стадионы, физкультура-сәламәтләндерү комплексы, шәһәр ипподромы, трактородром (комлы карьер).

Мәскәүдә 12нче апрельдә 2010 елның VIII Бөтенроссия җәйге авыл спорт уеннарына әзерләнү һәм аларны үткәрү буенча комитет утырышы узачак. Исегезгә төшерәбез: башкарма комитет рәисе булып Россия Федерациясе Хөкүмәте рәисенең беренче урынбасары Виктор Зубков билгеләнгән. Аның урынбасарлы исә - ТР Президенты Рөстәм Миңнеханов, РФ төбәкләр үсеше министры Виктор Басаргин, РФ спорт, туристлык һәм яшьләр сәясәте министры Виталий Мутко һәм РФ авыл хуҗалыгы министры Елена Скрынник.