Рөстәм Миңнеханов госпиталь каршындагы Тернәкләндерү медицинасы үзәгендә булды

Бүген Татарстан Президенты Рөстәм Миңнеханов әлеге учреждениедә Тернәкләндерү медицинасы үзәге ачылу уңаеннан Казанның сугыш ветераннары госпиталендә булды. Республика башлыгы өчен дәвалау учрежденисесе буенча экскурсияне ТР сәламәтлек саклау министры Айрат Фәррахов үткәрде.

Рөстәм Миңнеханов госпитальнең дәвалау корпусында беренче катта урнашкан кабул итү һәм диагностика бүлекләрендә булды, рентгенкабинет, инфомат, конференцияләр залындагы ветераннар өчен компьютер сыйныфы һәм тернәкләндереп дәвалау бүлегенең эше белән танышты. Президентка шулай ук госпитальнең мәгълүмат системасын күрсәттеләр. Моннан тыш, республика башлыгы Тернәкләндерү медицинасы үзәгендәге табиб кабинетлары һәм амбулатор бүлекчәләрне карады.

Дәвалау учреждениесенең беренче катында Чаллының сугыш ветераннары госпитале (бүген анда РФ Дәүләт Думасы Рәисенең беренче урынбасары Олег Морозов килгән иде) белән видеоэлемтә сеансы булды. Рөстәм Миңнеханов аннан Автошәһәрдә алган тәэсирләре белән кызыксынды һәм Казан госпиталендә башкарылган эш турында үз фикерләре белән уртаклашты.

“Соклануымның иге-чиге юк, - диде Олег Морозов. – Тәэсирләр – искиткеч. Биредә барысы да кешеләр өчен эшләнгән һәм бу эшләрнең бөек бәйрәм уңаеннан башкарылуы бик яхшы. Барысы да югары дәрәҗәдә эшләнгән!”

Рөстәм Миңнеханов якын көннәрдә Чаллы һәм Казанның сугыш ветераннары госпитальләре физик мөмкинлекләре чикләнгән пациентларны йөртү өчен автомобильләр алачагын әйтте.

Алга таба республика бшлыгына call-үзәк тәкъдим ителде, аның бурычы – пультка килгән һәр шалтыратуга сыйфатлы хезмәт күрсәтү. 23-91-911 номеры буенча дәвалау процессы, ветераннарның консультатив дәваханә эшенә кагылышлы барлык сорауларга җавап алырга мөмкин. Call-үзәк ветераннарның консультатив дәваханәсе регистратурасында урнашкан, анда 8 эш урыны булдырылган. Биредә эшләү өчен белгечләр әзерләнгән. Әлеге эш урыннары заманча һәм уңайлы чыбыксыз hands-free җайланмалары белән җиһазландырылган, анда хастаханә администраторлары эшли. Госпиталь администраторлары иртәнге сәгать 8 дән кичке 8 гә кадәр барлык шалтыратуларга җавап бирә, пациентларны кабул итүгә яза, киңәшләр бирә һәм белгечләргә җибәрә.

Татарстан Президенты хәзерге вакытта стационар дәвалауда булган ветераннар белән аралашты. Рөстәм Миңнеханов аларны якынлашып килүче бәйрәм – Бөек Җиңүнең 65 еллыгы белән котлады, ныклы сәламәтлек, озын гомер теләде. Һәр ветеранга чәчәк бәйләме һәм бүләкләр тапшырылды. Республика башлыгы Бөек Ватан сугышы ветераны Фәттах Гайнетдиновка “1941-1945 еллардагы Бөек Ватан сугышында Җиңүнең 65 еллыгы” медален тапшырды.

Бөек Ватан сугышында катнашкан хәрби-кыр хирургы, отставкадагы медицина хезмәте подполковнигы Татьяна Емелина Рөстәм Миңнехановка Бөек Җиңүнең 65 еллыгы уңаеннан язылган үзенең «Фронтовые дороги медиков Татарстана» дигән китабын бүләк итте.
Ветераннар үзләре турында кайгыртканы өчен республика башлыгына рәхмәт белдерде һәм аны Президент вазифасына керешүе белән котлады. “Госпиатльдә безгә мөнәсәбәт яхшы. Безгә даими кайгыртучанлык һәм игътибар күрсәтәләр. Сезгә бик зур рәхмәт”, - диде ветераннар.

Госпиталь белән танышканнан соң Рөстәм Миңнеханов журналистлар белән тәэсирләрен уртаклашты. “Тәэсирләр бик тә уңай. Мин бәйрәм хөрмәтенә Казан һәм Чаллыдагы сугыш ветераннары госпитальләрен төзекләндерә алуыбызга шатмын”, - диде ул.
Дәвалау учреждениесенең баш табибы Рафаэль Шәвәлиевнең сүзләренә караганда, госпиталь 13 нче шәһәр хастаханәсе базасында 1999 елда ачыла. Хәзерге вакытта госпитальдә 210 ветеран дәвалана. Тулаем алганда, госпиталь - 286 ветеранга, Тернәкләндерү медицинасы үзәге исә 30 урынга исәпләнгән. Госпиталь поликлиникасы көн саен 150 ветеранны кабул итә ала.

Дәвалау учреждениесендә 600 гә якын хезмәткәр эшли. Госпиталь Казан шәһәренең барлык ветераннарына һәм Татарстанның 23 районына хезмәт күрсәтә. Госпитальгә 100 меңнән артык ветеран, тыл хезмәтчәннәре һәм сугыш хәрәкәтләрендә катнашучылар беркетелгән.