Воронеж өлкәсе җитәкчелеге эшмәкәрлеккә ярдәм итү өлкәсендә Татарстан тәҗрибәсе белән кызыксына

Воронеж өлкәсе җитәкчелеген эшмәкәрлеккә ярдәм итү, дәүләт идарәсенең нәтиҗәлелеге өлкәләрендә Татарстанда тупланган тәҗрибә кызыксындыра. ТР Хөкүмәт йортында Премьер-министр Илдар Халиков белән очрашуда өлкә губернаторы урынбасары - Хөкүмәт рәисенең беренче урынбасары Александр Ганов шулай дип белдерде.

Инде хәбәр ителгәнчә, Александр Ганов җитәкчелегендәге Воронеж өлкәсе делегациясе бу көннәрдә Татарстанда эш сәфәрендә. Илдар Халиков белдерүенчә, делегациянең визит программасы бик җентекле – кыска вакыт эчендә кунаклар кирәкле объектлар белән тынышып, объектив мәгълүмат алырлык итеп әзерләнгән. Башка төбәкләрдән мондый делегацияләрне кабул итеп, Татарстан да яңа мәгълүматлар ала, тәҗрибә алмаша.

Александр Ганов очрашу вакытында бу сәфәрнең практик характерда булуына аерым басым ясады. Воронеж өлкәсе делегациясе аеруча игътибарга лаек өлкәләрдә Татарстан тәҗрибәсен өйрәнәчәк. Бүген Россиянең бу төбәге системалы һәм инфраструктура бурычларын чишү белән мәшгуль. Биредә 2020 елга кадәр социаль-икътисади үсеш стратегиясе кабул ителгән. Хәзер төп бурыч-төбәк икътисадын үстерүдә сизелерлек адымнар ясау.

Александр Ганов белдерүенчә, Воронеж өлкәсен кече һәм урта эшмәкәрлек үсеше өчен шартлар тудыру, нәтиҗәле дәүләт идарәсе буенча Татарстан белән тәҗрибә алмашу кызыксындыра.