Агымдагы елда республикада сулыкларда 91 кеше, шул исәптән 17 бала батып үлгән

Агымдагы елда республикада сулыкларда 91 кеше, шул исәптән 17 бала батып үлгән. Узган ел бу сан 123 белән исәпләнгән иде. Пляжларда исә 3 кеше үлгән, дип хәбәр ителде бүген ТР Министрлар Кабинетында үткән брифингта.

ТР Гадәттән тыш хәлләр министрлыгы башлыгы урынбасары Эмиль Фазлеев әйтеп үткәнчә, бу җәй республикага бик күп сюрпризлар бүләк итәчәк. “Татарстан халкының күбесендә йөзү культурасы һәм үз-үзен саклау хисе - юк дәрәҗәсендә. Кешеләр суга сикереп чума, исерек хәлдә суга керә. Бу исә фаҗигаләргә китерә дә”, - диде ул.

Брифингта әйтелгәнчә, бүгенге көндә республикада 34 пляжда су коенырга була. Быел 21 пляж файдалануга тапшырылмаган. Эмиль Фазлеев фикеренчә, су коенырга рөхсәт ителгән урыннар саны 200дән дә ким булырга тиеш түгел. Быел Гадәттән тыш хәлләр министрлыгы хезмәткәрләре тарафыннан су коену рөхсәт ителмәгән 193 урын булуы ачыкланган.

Ведомство суда бәхетсез очракларны кисәтү буенча зур эш башкара. Су объектларында тәүлек буе коткаручылар отрядлары эшли. Халык белән профилактика юнәлешендә эш алып барыла. Көн саен ял итү урыннары тикшерелә. Җитешсезлекләрне табып, ведомство вәкилләре аларны бетерү юнәлешендә эшли, муниципаль берәмлекләргә хатлар юллый. Быел шундый 204 хат җибәрелгән инде. Аларда муниципаль берәмлекләр башлыкларына җиһазланмаган ял итү урыннарында коткару постларын куярга, коткаручылар отрядларын булдырырга, хәмер эчемлекләрне сатуны тыярга, җиһазланмаган урыннарда су коенуны тыя торган белдерүләр урнаштырырга тәкъдим ителә. Бүгенге көндә республикада шундый 215 белдерү урнаштырылган.