Рөстәм Миңнеханов “Татнефть” ААҖ Директорлар советының чираттагы утырышын үткәрде

Бүген Әлмәттә Татарстан Республикасы Президенты – “Татнефть” ААҖ Директорлар советы рәисе Рөстәм Миңнеханов җитәкчелегендә “Татнефть” ААҖ Директорлар советының чираттагы утырышы узды.

Утырышта беренче яртыеллыкта “Татнефть” ААҖ бюджеты үтәлешенең нәтиҗәләре каралды һәм 2010 елның август бюджеты расланды.

2009-2010 елларда компанияне реструктурлаштыруның барышы һәм сервис хезмәте күрсәтүнең нәтиҗәлелеге турындагы мәгълүмат тыңланды. Үткәрелгән оештыру чаралары нәтиҗәсендә структур бүлекчәләрдәге персоналның өлеше - 76 дан 73, нефть химиясе комплексында 87 дән 71 процентка кадәр кимегән. Әлеге чорда “ТАНЕКО” Нефть эшкәртү һәм нефть химиясе заводлары комплексы төзелешендә, яңа төр шиннар эшләп чыгару һәм пыяла җепсел җитештерү заводларында, шулай ук “Идея-Көньяк-Көнчыгыш” технопаркының җитештерү мәйданчыкларында 9 меңнән артык яңа эш урыны булдырылган.

Реструктурлаштыру илнең нефть тармагында “Татнефть” ААҖнең хәлен ныгытырга, яхшы финанс-икътисади күрсәткечләргә ирешергә мөмкинлек биргән.

Утырышта шулай ук нефть чыгарганда энергия куллануны киметү максатларында чылбырлы приводлар турындагы мәгълүмат, РФ Шәһәр төзелеше комплексы таләпләренә бәйле рәвештә проектлау проблемалары хакында фикер алышынды.

Моннан тыш, Директорлар советында “Татнефть” ААҖ эшчәнлегенә кагылышлы башка мәсьәләләр каралды, дип хәбәр итә компаниянең матбугат хезмәте.