Андрей Малышев: “Татарстан “Роснанотех” өчен өстенлекле төбәкләрнең берсе булып кала”

Бүген ТР Министрлар Кабинетында “Роснанотех” дәүләт корпорациясе һәм Татарстан Республикасы арасында нанотехнологияләр һәм наноиндустрияне үстерү өлкәсендә Хезмәттәшлек итү турындагы килешүне гамәлгә ашыру буенча координация советының киңәйтелгән утырышы узды. Киңәшмәне ТР Премьер-министры Илдар Халиков үткәрде.

“Татарстан 2015 елга кадәр наноиндустрияне үстерүдә комплекслы программа эшләнгән һәм гамәлгә ашырыла торган Россия Федерациясенең беренче төбәге булды”, - дип ассызыклады киңәшмәдә Илдар Халиков.

Аның сүзләренә караганда, “Роснанотех” дәүләт корпорациясе белән тыгыз хезмәттәшлек итүгә дә карамастан, республика, кызганычка күрә, әлегә дәүләт корпорациясенең барлык ресурсларын һәм потенциалын файдаланмый. Татарстан предприятиеләренә “Роснанотех” дәүләт корпорациясе белән хезмәттәшлекне активрак үстерергә кирәк. ТР Хөкүмәте башлыгы барлык профиль министрлыклары һәм ведомстволарга нанотехнологияләр өлкәсендәге проектларны гамәлгә ашыруда ярдәм итәргә күрсәтмә бирде.

“Татарстан “Роснанотех” өчен өстенлекле төбәкләрнең берсе булып кала. Нанотехнология үзәге төзү буенча үткәрелгән конкурста республика заявкасының җиңеп чыгуы да уртак нәтиҗәле эшнең бер дәлиле”, - дип белдерде “Роснанотех” дәүләт корпорациясе генераль директоры урынбасары Андрей Малышев.
Искәртеп узабыз, 2009 елның 15 декабрендә “Роснанотех” дәүләт корпорациясе тарафыннан нанотехнология үзәкләре төзү буенча конкурс игълан ителде, анда Татарстан Республикасыннан “Татарстан Республикасында нанотехнология үзәге” проекты тәкъдим ителде, ул 2010 елның беренче яртыеллыгында “Идея” инновация-җитештерү технопаркы базасында Нанотехнология үзәге булдыру буенча заявка отты.

Киңәшмәдә төп доклад белән Татарстан Республикасында наноиндустрияне үстерү буенча республика ведомствоара комиссиясе рәисе Борис Павлов чыгыш ясады.

Аның сүзләренә караганда, хәзерге вакытта “Роснанотех” дәүләт корпорациясе белән хезмәттәшлек итү кысаларында сәнәгать нанотехнологияләре булдыру буенча Татарстанның 49 проекты карала, аларның бишесе хупланган. “Роснанотех” дәүләт корпорациясе фәнни-техник советының 2010 елның июлендә узган чираттагы утырышында “РАМ” ҖЧҖнең инвестиция проекты (“Нефть чыгару җиһазлары өчен золотник клапаннар җитештерү”) буенча уңай карар кабул ителде. Инвестицияләрнең күләме – 220 миллион сум, проект үзен 4,5 ел эчендә аклаячак.