Рөстәм Миңнеханов: Россия базарында эшне башлау өчен Тюрингия компанияләренең Татарстанны сайлауларын теләр идек
Татарстан Республикасы белән Федератив Германия Республикасы (ФРГ) арасында тышкы сәүдә әйләнеше 2015 елда 1 млрд. евродан артты. Бу хакта бүген "Татарстан-Тюрингия" икътисадый форумныда Татарстан Республикасы Президенты Рөстәм Миңнеханов хәбәр итте.
Икътисадый форум "Корстон" кунакханә комплексында үтте, анда Татарстан Республикасы һәм Тюрингия эшлекле даирәләре, ТР министрлык һәм ведомстволары, эре предприятиеләр җитәкчеләре җыелды.
Чарада шулай ук Тюрингия ирекле җире (ФРГ) Премьер-министры Бодо Рамелов катнашты.
Рөстәм Миңнеханов Бодо Рамеловка Россия Федерациясенең алдынгы регионы буларак Татарстанга игътибарлары һәм алга таба регионара хезмәттәшлекне үстерү мөмкинлеге өчен рәхмәт сүзләре җиткерде. "Халыкара һәм сәяси мохит яхшырыр, ә безнең бүгенгә бурычыбыз - бизнеска дөрес этәргеч бирү", - диде ТР Президенты.
"Татарстан Республикасы гадәттәгечә дөньяда икътисадның төрле тармакларында алдынгы урыннарда торучы Германия партнерлары һәм компанияләре белән үзара файдалы хезмәттәшлек яклы. Бүгенге очрашулар барышында Татарстан һәм Тюрингиянең эшлекле даирәләре вәкилләре алдынгы тәҗрибәләр белән алышырлар, бизнес алып бару өчен мөмкинлекләр турында сөйләшерләр, багланышлар өчен яңа юнәлешләр табырлар, дип өметләнәбез", - диде Рөстәм Миңнеханов.
Германия - безнең алдынгы тышкы икътисадый хезмәттәшебез, диде Татарстан Президенты, Татарстан белән Германия арасында 2015 елда товар әйләнеше 1 млрд. евродан артты һәм анда Германия импортының өлеше зур - бу машиналар һәм җиһазлар.
Рөстәм Миңнеханов исәкәрткәнчә, 5 ел элек "КАМАЗ" ГАҖдә «Мерседес Бенц Тракс Восток» җитештерү линиясе ачылды, һәм Татарстанның "Даймлер" компаниясе белән хезмәттәшлеге - Россия базарына чыгучы Германиянең башка компанияләре өчен уңай үрнәк.
Барлыгы Татарстанда 80 компания Германия инвестицияләре белән эшли, дип билгеләде Рөстәм Миңнеханов, без "Сименс", "Бош", "Кнор Бремзе" һәм башка компанияләр белән уңышлы эш алып барабыз. Моннан тыш, "Алабуга" махсус икътисадый зонасы резидентлары арасында Германия партнерлары белән хезмәттәшлектә 4 компания эшли.
«Метро», «Медиа Маркт», «Зельгрос» Германия компанияләре шулай ук татарстанлылар арасында популяр, дип билгеләде Татарстан Президенты.
Германия һәм Европаның үзәгендә урнашкан Тюрингия Көнбатыш һәм Көнчыгыш Европа регионнарын икътисадый яктан бәйләү ролен уйный, дип ассызыклады Рөстәм Миңнеханов. Төрингиядә автомобиль төзелеше, машина төзелеше, электроника һәм электр техникасы, оптика һәм җиһазлар төзү кебек тармаклар үскән. Төрингиядә шулай ук эре университетлар һәм фәнни-җитештерү үзәкләре урнашкан.
"Барлык бу юнәлешләр безнең республика предприятиеләре һәм оешмалары өчен кызыклы, - диде Рөстәм Миңнеханов. - Россия-Герания яңа технологияләр институтын Казанда ачуда һәм аны үстерүдә Ильменау Техник университеты - Тюрингиянең алдынгы вузы - актив катнашуына без шат".
Югары технологияләр тармагы безнең хезмәттәшлек өчен иң мөһим юнәлешләрнең берсе булачак, дип белдерде Татарстан Президенты. Аның сүзләренчә, бүген Татарстан һәм аның икътисады энергетика, нефть химиясе, автомобильләр төзелеше, очкычлар төзелеше, мәгълүмат технологияләре, агросәнәгать тармагы, инжиниринг, медицина һәм башка юнәлешләре белән Германия хезмттәшләребезгә кызыклы булачак.
Форум барышында Рөстәм Миңнеханов хәбәр иткәнчә, бүген регионда "Чаллы" алгарышла социаль-икътисадый үсеш территориясе эшли, анда резидент компанияләргә салымнар буенча льготалар тәкъдим ителә.
Якындагы елларда Татарстанда эре инвестицион проектлар гамәлгә ашырылачак, мәсәлән, "ИнноКам" Кама инновацион территориаль-җитештерү кластеры, Свияжск регионара мультимодаль логистика үзәге, "Мәскәү-Казан" югары тизлекле тимер юл магистрален төзү, "Европа - Көнбатыш Кытай" халыкара транспорт коридоры.
"Россия базарында эшне башлау өчен Тюрингия компанияләренең Татарстанны сайлауларын теләр идек. Без хезмттәшлеккә һәм эшлекле элемтәләрне үстерүгә ачык", - диде Рөстәм Миңнеханов.
Тюрингия ирекле җире Премьер-министры Бодо Рамелов, үз чиратында, билгеләгәнчә, Татарстан Тюрингия предприятиеләре өчен кызыклы сәнәгать регионы һәм базары, безнең регионнар арасында соңгы елларда яхшы элемтәләр урнашты, аеруча, икътисад, фән һәм инженерия өлкәләрендә.
Ул шулай ук хәбәр иткәнчә, июнь аены Тюрингиягә Татарстан делегациясенең эш визиты планлаштырылган, шул вакытка алга таба хезмттәшлек итү буенча "юл картасын" төзү мөһим.
"Татарстан-Тюрингия" форумы кысаларында Татарстан Республикасының сәнәгать мөмкинлекләре турында кыска презентация белән ТР Премьер-министры урынбасары - сәнәгать һәм сәүдә министры Альберт Кәримов чыгыш ясады.
Форумны йомгаклап Schulken Form компаниясе һәм "Химград" технополисы арасында ниятләр турында килешү имзаланды. Schulken Form җитәкчесе Марко Шюлькен һәм "Химград" генераль директоры Айрат Гыйззәтуллин имзаладылар. Документ пластмассаны эшкәртү өчен катлаулы коелма пресс-формаларны ясау, ремонтлау һәм техник яктан хезмәт күрсәтү проектын гамәлгә ашыруны карый. Проект Россия полимерларын эшкәртүчеләр, автомобильләр төзү өлкәсендәге компанияләр һәм башкалар өчен кызык була.