Рөстәм Миңнеханов: "Безнең киләчәк инициативалы һәм креатив кешеләргә бәйле"
Бүген Казанның IТ-паркында "Наш Татарстан" - "Безнең Татарстан" VI Республика яшьләр форумында җиңүчеләрне бүләкләделәр. Тантанада ТР Президенты Рөстәм Миңнеханов һәм РФ элемтә һәм массакүләм коммуникацияләр министры Николай Никифоров катнашты.
Искәртеп үтик, "Безнең Татарстан" - "Наш Татарстан" Республика яшьләр форумы ел саен төп яшьләр мәйданчыгы булып тора, анда теләсә кайсы яшь кеше һәм аның командасы проект тәкъдим итә һәм яклый, проектны гамәлгә ашыру өчен тарафдарларын таба алачак, җәмәгать һәм дәүләт ярдәменә ия, шулай ук проект эшчәнлеге буенча кыска вакытлы курслар уза һәм экспертлар, белгечләрдән консультация алачак. Форумны ТР Яшьләр эшләре һәм спорт министрлыгы ТР Яшь галимнәр һәм белгечләрнең төбәк яшьләр иҗтимагый хәрәкәте, "ТР Иҗади яшьләр академиясе" төбәк иҗтимагый оешмасы белән бергәлектә оештыра.
Наш Татарстан" - "Безнең Татарстан" VI Республика яшьләр форумы 21 апрельдә старт алды. Чара кысаларында эшләгән күргәзмәдә 1,2 мең чамасы проект арасыннан 42 иң яхшы проект тәкъдим ителде.
Бүген финалчыларны бүләкләгәнче, ТР Президенты, РФ элемтә һәм массакүләм коммуникацияләр министры, республика министрлыклары һәм ведомстволары вәкилләре күргәзмә экспозициясе белән таныштылар. Авторлар проектларны чынга ашыру буенча үз эшчәнлекләре турында сөйләделәр.
Аннары Николай Никифоров белән Рөстәм Миңнеханов ун тематик мәйданчык буенча иң яхшы эш авторларын бүләкләделәр. Җиңүчеләр оештыручылардан һәм форум партнерларыннан бүләкләр алды.
Н.Никифоров чарада катнашучылар алдында чыгышында, тәкъдим ителгән проектларның төрлелегенә һәм авторларның амбицияләренә шаккатуын белдерде.
"Бу бик мөһим. Хәзер Россиянең бөтен икътисады амбициоз, инновацион идеяләргә һәм бу идеяләрне уйлап табучы, эшләүче һәм, иң мөһиме, ахырына кадәр җиткерүчеләргә мохтаҗ. Мин, Татарстанда үсеш алырга һәм алга хәрәкәт итәргә мөмкинлек бирүче система булуы белән горурланам. Миңа калса, Татарстанда туган һәм яшәүче яшьләр өчен бу зур бәхет һәм өстенлек. Мондый проектларны һәм инициативаларны чынга ашырырга ярдәм итүче республика җитәкчелегенә рәхмәт сүзләремне җиткерәм", - диде РФ элемтә һәм массакүләм коммуникацияләр министры Николай Никифоров.
Татарстан Президенты ассызыклаганча, бүген без күргән проектлар республика һәм бөтен ил икътисады өчен зур кызыксыну уята.
"Безнең киләчәк инициативалы һәм креатив кешеләргә бәйле. Россиянең һәм Татарстанның киләчәге - ул сез. Сез - безнең терәк һәм горурлык", - диде Р.Миңнеханов форумда катнашучыларга мөрәҗәгать итеп.
"Наш Татарстан" - "Безнең Татарстан" VI Республика яшьләр форумы нәтиҗәләре буенча иң яхшы проектлар, өйрәнү һәм ярдәм күрсәтү өчен, республиканың профильле министрлыклары, ведомстволары, фәнни-тикшеренү оешмалары һәм предприятиеләренә җибәреләчәк.