Илдар Халиков Рязань өлкәсе делегациясе белән очрашты

Бүген Татарстан Республикасы Премьер-министры Илдар Халиков ТР Министрлар Кабинетында Рязань өлкәсе Хөкүмәте Рәисе урынбасары Александр Ревякин җитәкчелегендәге Рязань өлкәсе делегациясе белән очрашты.

Илдар Халиков очрашу башында күптән түгел Рязаньда булуы һәм шәһәр анда яхшы тәэсир калдыруы хакында хәбәр итте. ТР Хөкүмәте башлыгы тәҗрибә алмашуның әһәмиятен билгеләп үтте, шулай ук кунакларга Казан белән якыннанрак танышырга тәкъдим итте.

Рязань өлкәсе Хөкүмәте Рәисе урынбасары Александр Ревякин эшләренә югары бәя биргәне өчен Татарстан Премьер-министрына рәхмәт белдерде. “Без газлаштыру буенча шактый алга киттек, хәзер безнең өчен кулланучыларны индивидуаль җылытуга күчерү схемаларын табу һәм алардан нәтиҗәле файдалану мөһим”, - дип ассызыклады А.Ревякин. Ул Татарстанда энергия саклау өлкәсендәге нәтиҗәле эш тәҗрибәсен Рязань өлкәсендә дә кулланып карарга теләүләрен белдерде.

Татарстан Премьер-министры Илдар Халиков кунакларга Чаллыдагы эш тәҗрибәсе хакында сөйләде, анда “торак йортларның йөз проценты да куллануның барлык төрләре буенча исәпләү приборлары, 72 проценты җылылыкны исәпләүдә индивидуаль узеллар белән тәэмин ителгән”. “Белүемчә, Россиядә моның тиңдәше юк. Шул ук вакытта, нәтиҗәсе таң калдырырлык. Исәпләүнең башлангыч этабын узган шәһәрләрдә энергия куллану күләме башка калаларга караганда ике мәртәбә азрак”, - дип хәбәр итте И.Халиков.