Рөстәм Миңнеханов: "Без "Алабуга" МИЗның инвестицион фазасын озайтабыз
Татарстан Республикасы җитәкчелеге "Алабуга" махсус икътисадый зонасына яңа бурычлар билгеләде, алар хәзерге мәйданчык чикләреннән чыга. Шул бурычларны башкару өчен МИЗна яңа инфраструктура объектлары һәм яңа мәйданчыклар биреләчәк. Бу хакта бүген Татарстан Республикасы Президенты Рөстәм Миңнеханов "Алабуга" МИЗ Күзәтчелек советы утырышында хәбәр итте.
Утырыш ТР Хөкүмәте Йортында узды.
"Алабуга" махсус икътисадый зонасы илебездә иң уңышлыларының берсе булып чыкты, - диде Рөстәм Миңнеханов. - Без аңлыйбыз, "Алабуга" МИЗ - "ИнноКам" ның төп объектларының берсе, һәм яңа бурычлар булу сәбәпле, махсус икътисадый зона булган периметрында гына калырга тиеш түгел, дип саныйбыз. Без инвестицион фазаны озайтабыз һәм "Алабуга" МИЗ на яңа бурычлар билгелибез. Ул резидентларны җылылык һәм су белән тәэмин итәчәк, һәм шул ук вакытта уңайлы тормыш шартларын булдыру мәсьәләсе белән шөгыльләнәчәк, шул исәптән Алабуга шәһәрендә дә".
"Шулай ук без махсус икътисадый зона командасын яңа мәйданчыкларга җәлеп итү мөмкинлеге турында да уйлыйбыз, - диде Татарстан Президенты. - Бу Свияжсктагы мультимодаль логистика комплексы да, Түбән Камада гамәлгә ашырып була торган кызык проект та".
"Алабуга" МИЗ Күзәтчелек советы әгъзаларына яңа объектлар - Свияжск мультимодаль логистика комплексы, "Алабуга - Сити" кунакханәсе, Түбән Камадагы "Алабуга - 2" индустриаль паркы һәм Алабуга водоканалы - составына керү сәбәпле, махсус икътисадый зона үсешенең перспектив планы тәкъдим ителде.
Шулай ук утырышта потенциаль резидентларның 5 яңа проекты тәкъдим ителде. Инвестицияләрнең гомуми күләме - 605 млрд. сум.
«Транснефть-Синтез» компаниясе (Россия) yефть тармагы өчен турбулентлыкка каршы матдәләр җитештерергә планлаштыра (234 яңа эш урыны була). “Данафлекс-Алабуга” махсус икътисади зонада сыгылмалы төргечләр җитештерәчәк (272 яңа эш урыны). “Ростонер”АҖ офис техникасы өчен тонерлар һәм картриджлар эшләп чыгарырга тәкъдим итә (83 яңа эш урыны).
Моннан тыш, утырышта “Алабуга” МИЗында поливинилхлорид (ПВХ) пластикатлары һәм каландрланган, ягъни шомарак, сыгылмалырак булсын өчен суперкаландр аша чыгарылган ПВХ-пленкалар, монтажлау күбеге җитештерү мәйданнары ачу буенча проектлар каралды.
Күзәтү советындагылар резидент булырлык саналганнарның барысының да бөтен проектын хуплады. Алга таба проектлар РФ Икътисади үсеш министрлыгы карамагындагы Экспертлар советында каралачак, шуннан соң гына алар “Алабуга” махсус икътисади зонасы резиденты була ала.
“Без иң кыска вакытта компаниләргә МИЗ резиденты дәрәҗәсе алу өчен барлык документларны да формалаштырырга-рәсмиләштерергә тиешбез”, - дип басым ясап әйтте Рөстәм Миңнеханов.
Татарстан Президенты Алабуга районы хакимияте җитәкчелегенә персонал әзерләү, белгечләр җәлеп итү, торак һәм башка мәсьәләләрне хәл итү буенча эш башлауны йөкләде. Аерым алганда, “Татнефтехиминвест-холдинг” ААҖенә Татарстан Республикасының чимал ресурслары резидентларының яңаларын җитештерү процессына максималь җәлеп итү мәсьәләсен карау йөкләнде.