ТР Президенты Рөстәм Миңнеханов Казан метросының “Кәҗә бистәсе” станциясен ачуда катнашты

Бүген Казан метрополитенының күптән көтелгән “Кәҗә бистәсе” станциясе халыкка хезмәт күрсәтә башлады.

Станциянең монолит тимер-бетоннан ясалган конструкциясе колонна тибында, җир астында ике вестибюле бар. ТР Президенты Рөстәм Миңнеханов белән Казан шәһәре мэры Илсур Метшин беренче пассажирлар сыйфатында Кремль станциясеннән яңасына поездда килеп, аның уңайлыгын сынады, “хай-тек” стилендә эшләнгән станцияне карап, халыкка хезмәт күрсәтү шартларын күздән кичерде. Аларны исә “Казметроэлектротанс” МУП генераль директоры Әсфән Галәвов, “Казметрострой” МУП генераль директоры Марат Рәхимов, аның урынбасары Вадим Тәрҗеманов һ.б. рәсми затлар озатып йөрде.

Шушы 250 метр озынлыктагы һәм 22 метр киңлектәге станция төзелә башлаган, ягъни экскаватор чүмече җир катламына беренче тапкыр батырган 2005 елдан, бораулау машинасы Казансу елгасы астыннан ике араны казып чыккан 2006 елдан һәм 2009да тоннельләр төзелгәннән соң шактый вакыт үтте. Шул рәвешле, “Җиңү проспекты” станциясеннән “Кремль” станциясенә кадәр 6 тукталышлы (“Җиңү проспекты”, “Горки”, “Әмәт”, “Сукно бистәсе”, “Тукай мәйданы, “Кремль” станцияләре) ара 9,62 чакрым булса, “Кәҗә бистәсе”н дә кушып, җир асты юлы 11 чакрымнан артык дип күзалларга кирәк.

“Бүген, Яңа елны каршылар алдыннан, башкала метросының яңа станциясе ачылу - Казанның җәмәгать транспорты һәм шәһәрнең бөтен кешесе өчен тарихи вакыйга. Элек соңгы станция булган “Кремль”дан алып аннан 2342 метр арадагы “Кәҗә бистәсе” станциясе, чыннан да, - көтеп алынганы. Юллардагы вазгыятьне исәпкә алып, аның әһәмияте пассажирлар өчен нинди икәнен әйтмәсәң дә аңлашыла. Шуңа күрә, Татарстан Президенты Рөстәм Нургали улына, республикабыз Хөкүмәтенә ярдәм итеп торулары өчен рәхмәт белдерәм”, - диде мэр Илсур Метшин. Шәһәр башлыгы басым ясап әйткәнчә, бу, чыннан да, бик зур бүләк, ник дигәндә, шушы станция янындагы Казан дәүләт энергетика университетында гына да 10 мең студент белем ала, Казансуның ике яры җир астыннан тоташтырылып, Казан халкы бербөтенне тәшкил итте. Метро төзүчеләргә, хезмәте кергән һәркемгә рәхмәт, бәхет һәм шатлык телим, якынлашып килгән Яңа ел котлыйм, диде И.Метшин.

Болай булгач, пассажирлар агымы тәүлегенә 100 меңгә кадәр җитәчәк, кичә, мәсәлән, күпләп кар явуга бәйле рәвештә, беренче тапкыр 82 мең пассажирга хезмәт күрсәтелсә, гадәттә, 40-50 мең тирәсе була, дип белдерде Ә.Галәвов. “Шушы яңа станция эшли башлаган беренче 3 көндә поездлар “Кремль” станциясе белән ике араны 20 км/сәг тизлектә үтәчәк, аннары - 35 км/сәг, гыйнвар утраларында - гадәттәге режимда”, - дип аңлатты “Казметрострой” башлыгы. Аның сүзләренчә, һәркайсы 4әр вагонлы дүрт поезд линиягә чыга, станциягә килү интервалы 15 минут түгел, ә 11,5 минут булачак, тагын 3 состав китерелгәч (аларның беренчесе гыйнварда көтелә), интервал 7-8 минут тирәсе булачак.

Хәзерге вакытта “Кәҗә бистәсе” станциясе тест режимында эшли һәм 7 станция арасын пассажирлар 22 минутта үтә, алга таба нормаль режимга күчкәч, - 14 минут 50 секундта, дип шәрехләде Ә.Галәвов.

“Казметрострой” җитәкчесе Марат Рәхимов искәрткәнчә, хәзерге вакытта метрополитенның беренче линиясенең II чираты - “Заводская”, “Мәскәү” һәм “Дакабристлар” станцияләре төзелә.