Татарстан Президенты Сколковода Икътисадны модернизацияләү һәм Россияне инновацион үстерү буенча РФ Президенты каршындагы Совет президиумы утырышында катнашты

Бүген Икътисадны модернизацияләү һәм Россияне инновацион үстерү буенча РФ Президенты каршындагы Совет президиумы утырышын Россия Федерациясе Хөкүмәте Рәисе Дмитрий Медведев уздырды.

Чара «Сколково» инновацион үзәгендә (Мәсәкү өлкәсе) барды.

Утырышта Татарстан Республикасы Президенты Рөстәм Миңнеханов да катнашты. 

Утырышның көн тәртибендә Россия икътисадын модернизацияләү һәм технологик үстерү буенча РФ Президенты каршындагы комиссия проектларын гамәлгә ашыру мәсьәләләре; 2017 елда Илкүләм технологик инициативасын гамәлгә ашыру планы; «Технет» илкүләм технологик инициативасының «юл картасы» иде.

Утырыш башланыр алдыннан Дмитрий Медведев «Сколково» фонды резидент компанияләренең инновацион эшләнмәләрен карап чыкты.

Рөстәм Миңнеханов та компанияләрнең тәкъдим ителгән проектлары белән бик җентекләп танышты. Ул республиканың юнәлеш министрлыкларына проектларны әйбәтләп өйрәнергә кушты.   

Аннары утырышны ачып, Дмитрий Медведев билгеләп үткәнчә, илдә  инновацияләр темасы белән 2009 елдан системалы шөгыльләнә башладылар һәм Икътисадны модернизацияләү комиссиясе төзелде.