Владимир Путин: “Булгария” һәлакәте бөтен илне тетрәндерде”

Булгария” һәлакәте бернинди арттырусыз бөтен илне тетрәндерде. Бу хакта бүген Россия Премьер-министры Владимир Путин бу минутларда Казан Кремлендә Хөкүмәт комиссиясенең “Булгария” теплоходы һәлакәтендә гомере өзелүчеләр гаиләләренә һәм зыян күрүчеләргә ярдәм күрсәтү, һәлакәт нәтиҗәләрен бетерүгә багышланган утырышында белдерде.

Утырышта ТР Президенты Рөстәм Миңнеханов, комиссия рәисе, РФ транспорт министры Игорь Левитин, РФ Тикшерү комитеты башлыгы Александр Бастрыкин һ.б. рәсми затлар катнаша.

“Без барыбыз да төрле катаклизмнар һәм фаҗигаларга күнектек. Әмма 10 июльдә “Булгария” һәлакәте бернинди арттырусыз бөтен илне тетрәндерде. Никадәр корбаннар, никадәр баланың гомере өзелде. Җавапсызлык, куркынычсызлык кагыйдәләрен тупас бозу өчен кешеләр гомере белән түләү коточкыч хәл”, - дип белдерде Владимир Путин.

“Хокук саклау органанры җентекле, объектив тикшерү үткәреп, бөтен вазифаи затлар эшчәнлегенә тиешле бәя бирер дип уйлыйм, - диде Премьер. – Шулай ук Роспотребнадзордан сезнең ведомство күзлегеннән бу вәзгыятькә анализ бирүен сорыйм. Ничек итеп туристлык эшчәнлегенә, суднолар файдалануга лицензиясе булмаган компания эшләгән? Билетларны ничек портта сатканнар, портан ничек чыгарганнар, порт ничек бу компания белән килешү төзегән? Ростехнадзор, Ространснадзор кая караган? Бу ведомстволар кайда булган?”

“Бу эшчәнлек төренә килешү–хокукый, норма–хокук базасына анализ ясарга, бу кагыйдәләрнең үтәлеше буенча катгый контроль куярга һәм аларны бозган өчен җаваплылыкка тартырга кирәк”, - дип ассызыклады Премьер.

Владимир Путин кешеләрне коткарган “Арабелла” моряклары адресына, шулай ук авыр шартларда эшләүче водолазларга рәхмәт белдерде. Бу эшләрне оештыручылардан куркынычсызлык кагыйдәләрен үтәүләрен сорыйм”, - дип билгеләп үтте ул.

РФ Хөкүмәт башлыгы шулай ук компенсация түләүне оештыруга игътибарны юнәлтте. “Республиканың үз бюдетынна акча түли башлавын беләм. РФ Хөкүмәте тарафыннан федераль бюджеттан һәлак булучылар гаиләләренә 1 әр миллион, 400 әр мең җитди һәм уртача җәрәхәт алучыларга, җиңелчә җәрәхәт алучыларга 200әр мең бүлеп бирү турында карар имзаланды”, - дип белдерде Путин.

“Авыр хәлдә калган кешеләр үзләрен ялгыз тоймасын өчен, ярдәм итү өчен барысын да эшләү зарур. Аларга сәламәтлекләрен ныгытырга, матди яктан ярдәм итәргә, ятимнәр язмышы турында уйларга кирәк”, - дип ассызыклады Россия Премьер-министры.