Татарстан делегациясе Төркмәнстан башкаласына барачак

Якшәмбе көнне, ягъни 13 нче гыйнварда, Татарстан Премьер-министры Рөстәм Миңнеханов җитәкчелегендәге Татарстан Республикасы делегациясе 2 көнлек визит белән Төркмәнстанның башкаласы Ашхабадка барачак.
Делегация составында Татарстан Республикасы Премьер-министры урынбасары – мәдәният министры Зилә Вәлиева, Татарстан Республикасы сәнәгать һәм сәүдә министры Александр Когогин; “КАМАЗ” ААҖ, “Татнефть”, “Казан мотор төзү җитештерү берләшмәсе”, “Казан вертолет заводы”, “Ак Барс-Холдинг”, “А.М.Горький исемендәге завод”, “Серго исемендәге завод” җитештерү берләшмәсенең Федераль дәүләт унитар предприятиесе җитәкчеләре; министрлыклар һәм Кама автогиганты хезмәткәрләре, шулай ук Татарстан артистларының күпсанлы төркемнәре бар.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлихановның “Татар-Информ” агентлыгы корреспондентына хәбәр итүенчә, Татарстан делегациясе әгъзалары катнашындагы төп чаралар 14 нче гыйнварда үткәреләчәк.
Шул уңайдан, дүшәмбе көнне иртә белән Кыпчак авылында Төркмәнстанның беренче Президенты Сапармурат Ниязов (Төркмәнбашы) монументына чәчәкләр кую планлаштырыла. Аннан соң Татарстаннан килгән югары дәрәҗәле кунакларны бу Урта Азия республикасы башлыгының яңа резиденциясендә көтеп алачаклар. Анда илнең хәзерге җитәкчесе Гурбангулы Бердымухаммедов белән очрашу уздырылачак. Бераз соңрак Татарстан Республикасы хөкүмәт делегациясе әгъзалары үзләренең Төркмәнстандагы хезмәттәшләре белән очрашачак. Анда ике яклы документларга кул кую карала.
Көннең икенче яртысында Рөстәм Миңнеханов һәм аны озатып йөрүче кешеләр Төркмәнбашы исемендәге Ашхабад туку комплексына барачаклар. Ул хәтта дөньякүләм үлчәмнәр буенча да эре җиңел сәнәгать предприятиесе булып санала, анда 3,5 меңгә якын кеше эшли.
Татарстан кунаклары шулай ук Төркмәнстандагы “КАМАЗ” ААҖ нең укыту-сәүдә сервис комплексы төзелә торган урында да булачаклар. Аны ачу агымдагы елның маена планлаштырыла. Искә төшереп узыйк: Чаллы автогиганты тышкы сәүдә компаниясенең Ашхабад вәкиллеге 2006 елда ачылган иде. Хәзерге вакытта бу ил “КАМАЗ” ААҖ нең иң динамик үсешле чит ил базарына әверелде. Йөк автомобильләре сатып алу буенча Төркмәнстан чит илләр арасында лидерлар өчлегенә керде: әгәр 2002 елга кадәр анда 300 автомобильдән аз гына күбрәк җибәрелгән булса, 2003-2005 еллар дәвамында – ел саен 65-105 йөк машинасы, ә 2006 елда меңләп “КАМАЗ” машинасы сатылды һәм ул яңа йөк автомобильләре базарының 78 % ын тәшкил итте. Әле күптән түгел генә Төркмәнстандагы “КАМАЗ” автопаркында (автобусларны да кертеп) 32,2 мең берәмлек транспорт чарасы исәпләнә иде, шуларның якынча 4,3 меңе кулланылышта булды.
Магтымгула исемендәге музыка һәм драма театрында уздырылачак татарчага тәрҗемә ителгән “Рухнамә” китабын тәкъдир итү тантанасы Татарстан Республикасы делегациясе визитының үзенчәлекле “таҗы” булачак. Әлеге чарада Татарстаннан килгән иҗат коллективлары катнашачак.