Казанга Универсиада байрагы кайтты

“Казан” Халыкара аэропортында 2013 елгы Универсиада рухы сизелде. Волонтерлар, журналистлар, спортчыларның туганнары һәм дуслары, җанатарлар FISU әләме пәйда булуын көтте. Кытайдан әләмне алып кайтучы Татарстан делегациясен Татарстан Республикасы Президенты Рөстәм Миңнеханов каршы алды.
“Бөтендөнья универсиадасы әләме Казанга кайтты”, - дип Татарстан башкаласы мэры Илсур Метшин әләмне Рөстәм Миңнехановка тапшырды.
“Безнең хыял чынга ашты - әләм бездә, - дип сәламләде ТР Президенты аэропортка җыелучыларны. – Мин барыгызны да котлыйм. Әләм Казанны бөтен дөньяга таныту символы”.
Шеньженьда Уеннарда катнашкан спортчылар исеменнән 2011 елгы Универсиадада ике тапкыр чемпион булган фехтовальщик Камилла Гафурҗанова чыгыш ясады. Спортчы шәһәр белән республика җитәкчелегенә Казан һәм Татарстан спортчыларына күрсәткән ярдәмнәре өчен рәхмәт белдерде.