ТР Президенты Казанның тарихи үзәгендәге йортларны карады

Бүген Татарстан Президенты Рөстәм Миңнеханов шәһәр үзәге буйлап экскурсиядә тарихи биналар белән танышты. Республика башлыгы өчен экскурсияне Казан экскурсоводы, Бөтенроссия тарихи һәм мәдәни һәйкәлләрне саклау җәмгыятенең Татарстан бүлеге советы әгъзасы Олеся Балтусова үткәрде.
Казанның тарихи йөзен саклау хәрәкәте активисткасы О.Балтусова үз блогында Татарстан Президентына ачык хат юллаган, анда ул юкка чыгу янаган тарихи биналарны карарга чакырган. Рөстәм Миңнеханов тәкъдимне кабул иткән һәм бүген Казан буенча җәяүле экскурсиядә шәхсән иске йортларның торышы белән танышты.
Республика башлыгы Бауман урамында ташландык хәлдәге ишегалдына керде. О.Балтусова Рөстәм Миңнехановның игътибарын “Казан” кунакханәсе бинасына юнәлтте.
ТР Президентына Казанда сакланган иң иске бина - Иван Михляев йорты күрсәтелде, 1722 елда анда император Петр I тукталган. Бу бина ярым җимерек хәлдә.
Чит ил кунаклары меңьеллык Казанда тарихи биналарның ташландык хәлдә булуына аптырый, дип сөйләде Олеся Балтусова.
ТР Президенты тарихи биналарның хуҗаларын җаваплылыкка тартырга кирәк, дип белдерде.
Җимерелгән тарихи биналар урынына зур яңа торак комплекслары төзелә. Бу факт ТР башлыгында канәгатьсезлек уятты, аның фикеренә караганда, тарихи үзәктә биек йортлар төзүгә юл куймаска кирәк. Рөстәм Миңнеханов төзелеш, архитектура һәм торак-коммуналь хуҗалык министры Ирек Фәйзуллинга төзелешкә бирелгән рөхсәтне һәм ихтыяҗ булганда төзелә торган биналарның проектын яңадан карауны йөкләде.
Экскурсия тәммамлангач Рөстәм Миңнеханов Олеся Балтусовага рәхмәт белдерде һәм киләчәктә Казанда тарихи һәм мәдәни һәйкәлләрне саклауга зур игътибар биреләчәк дип ышандырды. Ул шулай ук ТР Хөкүмәтенең тиешле структураларына шундый экскурсияләр оештыру өчен җәяүле маршрутлар төзүне йөкләде.