Татарстан Президенты Г.Тукай ис. дәүләт бүләкләрен тапшырды

Бүген Г.Камал исемендәге Татар дәүләт академия театры каршындагы мәйданда Татарстан Республикасының Габдулла Тукай исемендәге Дәүләт премияләрен тапшыру тантанасы булды. Лауреатларга бүләкләрне Татарстан Президенты Рөстәм Миңнеханов тапшырды.

Чарада шулай ук ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР Премьер-министры Илдар Халиков, Казан мэры Илсур Метшин катнашты.

Мактаулы бүләккә шагыйрь, ТР Язучылар берлеге рәисе Илфак Ибраһимов, җырчы Альбина Шаһиморатова, шагыйрә Лена Шагыйрьҗан, рәссамнар Мария һәм Рөстәм Килдебәковлар лаек булды.

Рөстәм Миңнеханов үз чыгышында билгеләп узганча, быел Габдулла Тукайның тууына 125 ел тулу уңаеннан дөньяның төрле почмакларында бәйрәм чаралары үтте, һәйкәлләр ачылды. “Тукай исемендәге премиягә лаек булу өчен бөек кеше булу кирәк. Без үзебезнең лауреатлар белән горурланабыз, аларга иҗади уңышлар телибез. Әлеге премияне ел саен тапшыру традициясе дәвам итәчәгенә ышанам”, - дип ассызыклады ТР Президенты.

Үз чиратында, лауреатлар югары бәя биргән өчен республика җитәкчелегенә рәхмәт белдерде. “Бүген берьюлы берничә бәйрәм бергә туры килде. Әлеге бүләк өчен зур рәхмәт. Бу иртәдә мәчеттә үзебезнең Президентыбызны күргәч күзләрдә шатлык яшьләре ялтырады”, - диде Лена Шагыйрьҗан һәм Габдулла Тукайга багышланган шигырен укыды.

“Тукай исемендәге премия минем өчен иң зур бүләк булды. Бөтен дөньяда бөек татар халкының мәдәниятен пропагандалау өчен бар көчемне куячакмын”, - диде дөнья күләмендә танылган җырчы Альбина Шаһиморатова.

ТР Дәүләт премияләрен тапшыру төгәлләнгәннән соң мактаулы кунаклар Камал театры янында урнаштырылган “Шүрәле табышмаклары” һәйкәлен ачу тантанасында катнашты. Һәйкәлнең авторы – Г.Тукай исемендәге Дәүләт премиясе лауреаты, Казанның танылган скульпторы Асия Миңнуллина.
Бәйрәм Татарстанның мәдәният һәм сәнгать эшлеклеләре катнашындагы концерт программасы белән төгәлләнде.