Рөстәм Миңнеханов: "Безгә Ленинград өлкәсе белән эшне системалы рәвештә җайга салырга кирәк"

Татарстан Республикасы белән Ленинград өлкәсе икътисадның төрле юнәлешләрендә - машина төзелеше, авыл хуҗалыгы, транспорт өлкәсендә хезмәттәшлек итә ала һәм хезмәттәшлек итәргә тиеш. Бүген бу хакта ТР Президенты Рөстәм Миңнеханов Ленинград өлкәсе губернаторы Валерий Сердюков белән очрашуда белдерде. Очрашу Санкт-Петербургта Ленинград өлкәсе Хөкүмәт бинасында узды.

Ленинград өлкәсе губернаторы Валерий Сердюков очрашуда Татарстан делегациясен сәламләде. Ул төбәкләр арасында күптәнге дустанә һәм эшлекле мөнәсәбәтләр җайга салынган дип билгеләп үтте. Күптән түгел Ленинград өлкәсе делегациясе республикада эш сәфәрендә булды. “Яңа эш юнәлешләре күрдек, аерым алганда, технопарклар һәм индустриаль зоналар ачканда”, - дип белдерде В.Сердюков.

Шулай ук аның сүзләренә караганда, Ленинград өлкәсен республиканың кече һәм урта бизнесны үстерү тәҗрибәсе кызыксындыра. Губернатор билгеләп үткәнчә, өлкәдә кече һәм урта бизнес өлеше җитәрлек дәрәҗәдә түгел. Аны арттыру өчен Ленинград өлкәсендә индустриаль парклар челтәре булдыру планлаштырыла.

Үз чиратында Рөстәм Миңнеханов Ленинград өлкәсенең логистика үзәкләрен үстерүдә һәм чит ил инвесторларын җәлеп итү тәҗрибәсен билгеләп үтте. Ул шулай ук республиканың икътисади потенциалын белдерде. Ленинград өлкәсе белән Татарстан “Ford-Sollers” уртак предприятиясен ачу нәтиҗәсендә, тагын да тыгызрак элемтәдә торачак, чөнки аларда компаниянең автомобиль заводлары эшләчәк.

Рөстәм Миңнеханов технопарклар оештыру өлкәсендә республика тәҗрибәсе белән уртаклашты. ТР Президенты фикеренә каараганда, кече һәм урта бизнес өчен мондый мәйданчыклар булдарганда һәрберсенең эшчәнлек юнәлешен билгеләү зарур. “Кече бизнес эре бизнес янәшәсендә булырга тиеш”, - дип ышаныдрды ТР Президенты һәм уңышлы проект буларак, “Мастер” Кама индустриаль паркын мисал итеп китерде.

Шулай ук республика башлыгы Ленинград өлкәсе хезмәттәшләренә “Бәләкәч” балалар бакчасы төзелеше программасы һәм балалар туклануының заманча системасын оештыру тәҗрибәсе турында сөйләде.

ТР Президенты төбәктә яшәүче татарларга бирелә торган игътибар өчен Ленинград өлкәсе җитәкчелегенә аерым рәхмәт сүзләре белдерде.

“Безнең өчен Ленинград өлкәсе белән эшне системалы җайга салу мөһим”, - дип белдерде Татарстан Президенты.

Очрашу ахырында Рөстәм Миңнеханов Ленинград өлкәсе вице-губернаторы- Ленинград өлкәсе губернаторының Закон чыгару Җыенындагы вәкиле Александр Кузнецовка “Фидакарь хезмәте өчен” медален тапшырды.

Бүген Татарстан делегациясе Ленинград өлкәсенә эш сәфәре кысаларында “Усть-Луга” диңгез сәүдә портында һәм “Галактика” ҖЧҖ сөт комбинатында булачак.