Рөстәм Миңнеханов алтынчы чакырылыш Дәүләт Думасына Татарстаннан сайланган депутатлар белән очрашты

Бүген Татарстан Республикасы Президенты Рөстәм Миңнеханов Казан Кремлендә “Бердәм Россия” партиясеннән 6 нчы чакырылыш Дәүләт Думасындагы Татарстан депутатлары белән очрашты. Очрашуда шулай ук ТР Премьер-министры Илдар Халиков һәм Татарстан Дәүләт Советы Рәисе Фәрит Мөхәммәтшин катнашты.

6 нчы чакырылыш Дәүләт Думасында Татарстанны 13 “бердәмроссияле” депутат тәкъдим итә. Алар арасында Россия парламентында эшләгән депутатлар да, Думада депутат кәнәфиен беренче мәртәбә биләүчеләр дә бар. Татарстан Президенты очрашу барышында депутатлар белән алар алдында торган бурычлар хакында фикер алышты.

Очрашу тәмамланганнан соң депутатларның берсе – Олег Морозов хәбәр иткәнчә, Татарстан “бердәмроссиялеләре” 6 нчы чакырылыш Дәүләт Думасында иң зур вәкиллекләрнең берсе. “Без барлык төп комитетларны да тутырачагыбыз турында килештек. Һәр депутатка теге яки бу министрлыклар һәм ведомстволар, шулай ук Татарстан катнашырга тиешле федераль программалар беркетеләчәк”, - дип белдерде О.Морозов.

Аның сүзләренә караганда, һәр депутат закон чыгару эшчәнлеге белән дә шөгыльләнәчәк.

Үз чиратында, ТР Дәүләт Советы Рәисе Фәрит Мөхәммәтшин “Бердәм Россия” партиясенең Татарстан төбәк бүлеге җитәкчелегенең яңа сайланган депутатлар белән очрашуы нәтиҗәләрен Рөстәм Миңнехановка җиткерүе хакында хәбәр итте.

Фәрит Мөхәммәтшинның сүзләренә караганда, Татарстан Президенты Рөстәм Миңнеханов Татарстаннан сайланган депутатларга координация советы кысаларында элеккеге кебек квартал саен түгел, ә ай саен җыелырга тәкъдим иткән.

Республика Дәүләт Советы Рәисе хәбәр иткәнчә, Татарстан депутатлары 6 нчы чакырылыш Дәүләт Думасында сайлаучылар белән эшне көчәйтәчәк. “Урыннарда депутат атналыклары үткәреләчәк, депутатлар безгә күпме очрашу уздырылуы, халык тарафыннан нинди проблемалар күтәрелүе хакында мәгълүмат бирәчәк. Без исә бу мәгълүматны тиешле структураларга җиткерәчәкбез”, - дип белдерде Ф.Мөхәммәтшин.