Рөстәм Миңнеханов РФ Президенты каршындагы бала хокуклары буенча вәкил Павел Астахов белән очрашты

Бүген Татарстан Президенты Рөстәм Миңнеханов РФ Президенты каршындагы бала хокуклары буенча вәкил Павел Астахов белән очрашты.

Павел Астахов Казанга Чуашстан Республикасында балалар йортлары һәм приютлар, махсуслаштырылган медицина учреждениеләренең эше белән танышканнан соң тикшерү визиты белән килде. Искәртеп узабыз, Павел Астахов илнең 70 тән артык төбәгендә булды инде.

Бүген ТР Хөкүмәте йортында Рөстәм Миңнеханов белән узган очрашуда Павел Астахов балаларның хокукларын тәэмин итү, социаль ятимлек проблемалары, балалар арасында үз-үзенә кул салу очраклары, балалар һәм яшүсмерләргә психологик ярдәм күрсәтүгә бәйле мәсьәләләрне кузгатты.

Очрашуда шулай ук ТР Премьер-министры урынбасары Зилә Вәлиева, ТР Президентының социаль мәсьәләләр буенча ярдәмчесе Татьяна Ларионова, Татарстанда бала хокуклары буенча вәкил Гүзәл Удачина катнашты.

Бу Павел Астаховның Татарстанга тәүге визиты. Сәфәр кысаларында Казанда девиант тәртипле балалар һәм яшүсмерләр тәрбияләнә торган махсус мәктәп (Левченко бистәсе), Республика махсуслаштырылган сабыйлар йорты (Ямашев урамы, 88а), Казанның Идел буе балалар йорты (Агрономия урамы, 14) һәм башка объектлар белән танышу планлаштырылган.

Көннең икенче яртысында Павел Астахов Татарстан Республикасы дәүләт һәм муниципаль хакимият органнары, РФ башкарма хакимиятенең Татарстан буенча территориаль органнары җитәкчеләре белән киңәшмә үткәрәчәк. Киңәшмә видеоконференция режимында ТР Хөкүмәте йортында уза. Чара тәмамланганнан соң Павел Астахов гаммәви мәгълүмат чаралары вәкилләренең сорауларына җавап бирер дип көтелә.