Марокконың Россиядәге вәкиле: Марокко Корольлеге Татарстан белән хезмәттәшлек итүе белән кызыксына

Марокко Корольлеге Россия Федерациясенең бер төбәге буларак Татарстан Республикасы белән ике яклы хезмәттәшлекне ныгыту белән кызыксына. Бүген Марокконың РФдәге Гадәттән тыш һәм Тулы вәкаләтле вәкиле Әбделкадыйр Лешехеб Татарстан Республикасы Президенты Рөстәм Миңнеханов белән очрашуда шулай дип белдерде.

ТР Хөкүмәт йортында узган очрашуда Марокко Корольлеге делегациясе әгъзалары, ТР Президенты Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов, ТР мәдәният министры Айрат Сибагатуллин, ТР яшьләр эшләре, спорт һәм туристлык министры Рафис Борһанов, ТР Инвестицион үсеш агентлыгы җитәкчесе Линар Якупов, КФУ ректоры Илшат Гафуров һ.б. катнашты.

ТР Президенты Рөстәм Миңнеханов кунакларны сәламләп, беренче чиратта, РФдәге Гадәттән тыш һәм Тулы вәкаләтле вәкиле Әбделкадыйр Лешехебка Татарстанда Марокко мәдәният көннәрен оештыруда актив катнашулары өчен рәхмәт белдерде.

Рөстәм Миңнеханов сүзләренә караганда, әлегә Татарстанда Марокко мәдәнияте, традицияләре, тарихы хакында аз беләләр, әмма хәзерге заманда глобальләшү чорында үз тамырларыңны һәм традицияләренне саклый белү әһәмияткә ия. Татарстан Республикасы – күп конфессияле төбәк, биредә 100 дән артык милләт вәкиле тату яши, дип искәртте Рөстәм Миңнеханов, һәм бу Татарстан белән Марокконы берләштерә.

Ике як өчен дә файдалы мөнәсәбәтләргә килгәндә, ул барыннан да элек мәдәният һәм мәгариф өлкәсендә хезмәттәшлек итү. Иртәгә Татарстан белән Марокко вузлары арасында хезмәттәшлек турында килешү төзеләчәк, дип искәртте Рөстәм Миңнеханов. Бу адым төбәкләр арасында студентлар алмашуны арттырырга мөмкинлек бирә дип ниятләнә. Безнең студентларның Мороккода укуын һәм сез үзегезнекеләрне Казанга җибәрүегезне телибез, диде Рөстәм Миңнеханов илче әфәндегә мөрәҗәгать итеп. Мондый тәҗрибә бар инде, Татарстанның 30 студенты Мароккода стажировка узды, телне, тарихны һәм бу илнең традицияләрен өйрәнде.

Татарстан Мароккода халык кәсебе өлкәсен үстерү һәм саклау программасы белән дә кызыксына, дип билгеләп үтте ТР Президенты. Аның сүзләренә караганда, программа уникаль һәм халык кәсебе өлкәсендә җитештерү күләмен арттырырга мөмкинлек бирә.

Рөстәм Миңнеханов Татарстанда Марокко мәдәнияте көннәре бу илнең потенциалын өйрәнергә, шулай ук Татарстан белән Марокко арасында сәүдә-икътисади мөнәсәбәтләрне ныгытырга мөмкинлек бирә дип белдерде.

Хезмәттәшлек итүнең чираттагы адымы – бизнес-делегацияләр белән алмашу, диде ТР Президенты, бу безнең мөнәсәбәтләрне алга җибәрү булачак.

Бүген Россия белән Марокконы Стратегик партнерлык турындагы килешү берләштерә дип белдерде Марокконың РФдәге Гадәттән тыш һәм Тулы вәкаләтле вәкиле Әбделкадыйр Лешехеб. Аның сүзләренә караганда, бу документ кысаларында Россия Федерациясенең бер төбәге буларак Татарстан Республикасы белән хезмәттәшлеккә зур игътибар бирелә. Илче әфәнде фикеренә караганда, Татарстанда Марокко мәдәнияте көннәре туристлык һәм сәүдә өлкәләрендә мөнәсәбәтләрне үстерүгә бер адым булачак.

Әбделкадыйр Лешехеб Казанга сәфәре кысаларында ТР Мәдәният министрлыгы, ТР Яшьләр эшләре, спорт һәм туристлык министрлыгы, ТР Сәнәгать һәм сәүдә министрлыгы вәкилләре белән очрашулар үткәрүен белдерде. Ул Марокко белән Татарстан арасында хезмәттәшлек итү программасы өстендә бергәләп эшли башларга тәкъдим итте. Ул шулай ук Мароккодан килгән студентлар 2013 елда Казанда узачак җәйге Универсиада да катнашачак, дип вәгъдә итте.