Илдар Халиков: “Студентларга үзләре теләгән проектларны тормышка ашыруда амбициялерәк булырга кирәк”

Идеяләрне тормышка ашыру өчен шартлар тудырылган, мөмкинлекләр җитәрлек, бары тик үзегезнең сәләтегезне 100 процент дәрәҗәсендә эшкә җигү мөһим – ТР Премьер-министры Илдар Халиков бүген Казан федераль университетында республиканың студентлар үзидарәсе лидерлары белән очрашуда әнә шулай дип белдерде.
Очрашуда ТР Премьер-министры урынбасары – Мәгълүматлаштыру һәм элемтә министры Николай Никифоров, Гаммәви коммуникацияләр һәм матбугат республика агентлыгы җитәкчесе Марат Моратов, министрлык һәм ведомство вәкилләре һәм башка кунаклар катнашты.
Илдар Халиков очрашу вакытының бик дөрес сайланганын, ягъни башкарылырга тиешле эшләрнең төгәлләнү стадиясендә булуын билгеләп узып, студеентларга көтеләчәк сессиядә уңышлар теләде һәм якынлашып килүче Яңа ел белән тәбрикләде.
Тимур Сөләйманов исә, Студентлар лигасының студентчылык мәнфәгатьләрен кайгырткан кайбер проектларына кыскача тукталды һәм лиганың 15 еллык эшчәнлеге дәверендә студент инициативаларын хуплау, үстерү буенча эшнең җайга салынганлыгын билгеләп узды. Ул шулай ук килсе елның мартында Казанда Идел буе федераль округы студентлары конгрессы узачагына өметен белдерде.
Тимур Сөләйманов “студентлар өчен йөрү билеты” проектының ярты елга түгел, ә аны ел буена гамәлгә ашыруның традициягә кереп китергә тиешлеген билгеләп узды. Агымдагы елның беренче яртыеллыгында иң актив 2 мең студентка 1600 сум грант бирелгән, сентябрьдән декабрьгә кадәр вакыт өчен тагын 4 мең студентка бу акчалар түләнәчәк. Студентлар лигасы президенты әйтүенчә, оешма алдында студентларны эш урыннары белән тәэмин итү, студентлар массакүләм мәгълүмат чараларына үсеш юлы ачу, мәдәният һәм спорт өлкәләрендә белем алучыларның башлангыч идеяләрен алга сөрү кебек бурычлар тора.
Тимур Сөләйманов “Татар-информ” мәгълүмат агентлыгы хәбәрчесенә билгеләп узганча, республика күләмендә югары уку йортлары студентлары арасында төрле спорт төрләре буенча спартакиада башланган.

Очрашуда идеяләре белән уртаклашкан, теге яки бу мәсьәлә буенча башка чыгышлар да яңгырады. Әйтик, эре шәһәрләрдә студентлар шифаханәләрен һәм кабинетларын ачу кебек сорауга, Премьер-министр болай дип җавап бирде: “Студентлар күпләп тупланган урында махсуслаштырылган шифаханәләр ачу – дөрес фикер. Медицина ярдәме кирәк булган очракта якында гына, уку урынында мөрәҗәгать итү уңайлы булыр иде”. Студентлар тарафыннан ел әйләнә эшләүче профильле лагерьләр эшен оештыру зарурлыгы да искәртелде. Илдар Халиков бу идеягә дә хәер-фатихасын бирде. Борчыган сорауларга тәгаен җавап алыр, уртаклашасы килгән идеяләргә шәрехнамәләр ишетү өчен, ул электрон почтасының адресын калдырырга вәгъдә бирде. Студентлар үзләренең тәкъдимнәрен аның шәхсән үзенә җибәрә алачак.
Студентлар сорауларын яудырганнан соң, Хөкүмәт башлыгы үзе сүз алды. “Сезнең кызыклы яшәү рәвеше алып баруыгыз сөендерә. Җәмәгатьчелек эшләре белән җитди шөгыльләнүегез тормышыгызда үз эзен калдырачак. Әмма мин бүген тагын да кыюрак тәкъдимнәр ишетермен дип уйлаган идем, студентларга үзләре теләгән проектларны тормышка ашыруда амбициялерәк булырга кирәк”, - дип мөрәҗәгать итте Илдар Халиков. Ул ассызыклаганча, киләсе елга республика бюджетында төрле проектлар һәм чаралар өчен күләмле акчалар каралган. “Ул финанс чараларыннан файдаланыгыз, олямагыз, аларны нәтиҗәле төстә эшкә җигәргә уйлаган очракта, сез студентларга да, министрлык һәм ведомстволарга да ярдәм итәчәксез”, - дип белдерде ул.
“Студентларның эшкә урнаша алмау проблемасын миңа еш ишетергә туры килә, әмма мин аны аңламыйм. Кая гына барсаң да, теләсә-кайсы тармакта югары квалификацияле кадрларга кытлык проблемасы турында сүз чыга, оста белгечләр җитми дибез – бүгенге көндә бу Татарстан икътисады үсешенедә төп проблема, ә студентлар эш таба алмый тилмереп йөри. Бу ниндидер аңлашылмаучанлык, Хезмәт, мәшгульлек һәм социаль яклау министрлыгы белән дискуссияләр, җанлы әңгәмәләр уздырырга кирәк. Искиткеч кызыклы юнәлештә белгечлекләр бар бит, хезмәт өчен түләү фонды да саллы гына. Минемчә, проблеманың сәбәбенә төшенергә омтылу, күп кенә студентларга үз урынын табарга ярдәм итәчәк”, - дип басым ясый Илдар Халиков.
Премьер-министр билгеләп үткәнчә, Татарстан Хөкүмәте мәдәният һәм спорт өлкәсендәге кызыклы проектлар ишетергә шат булачак. “Универсиадага килгәндә, барысы да әле башлана гына. Аңа әзерлек, үсеш көннән-көн арта барачак. Казанда калкып чыгучы берсеннән-берсе мәһабәт спорт сарайларына Россия студентлары гына түгел, чит ил студентлары да көнләшерлек. Алардан максималь рәвештә файдаланырга, спартакиадалар үткәрергә кирәк”, - дип киңәш бирде Илдар Халиков.
“Кыскасы, теләгән кешегә идеяләр хәттин ашкан, барысы да үзегездән тора. 99 процент дәрәҗәсендә яшәргә ярамый, үзеңне 100 процентка эшкә җигү зарур”, - дип төгәлләде ул.
Очрашу кысаларында шулай ук Илдар Халиков йөзендә ТР Хакимияте, Илшат Гафуров йөзендә ТР югары уку йортлары ректорлары советы һәм Тимур Сөләйманов йөзендә ТР Студентлар лигасы арасында күптән көтелгән өчьяклы килешү рәсмиләштерелде.