2012 елның 1 февраленнән хезмәт пенсиясе арта

Татарстанда бүген 1 пенсионерга уртача 1,74 эшләүче туры килә, ләкин 2030 елга 1:1 булыр дип фаразлана. Республиканың социаль һәм икътисади яктан үсештә булуын исәпкә алып, тагын 10-15 елдан татарстанлының уртача гомер озынлыгы 75-80 яшькә җитәргә мөмкин, ә бүгенгә ирләрнең уртача гомер озынлыгы – 64 яшь, хатын-кызларның – 73.

Бүген ТР Хөкүмәте йортында журналистлар белән очрашкан Россия Пенсия фондының ТР буенча бүлеге идарәчесе Марсель Имамов шундый мәгълүматлар китерде.

2015 елга кадәр картлык буенча пенсиягә чыгу яшен арттыру турында сүз алып барылмый, ләкин, иртәме-соңмы, бу мәсьәләдә үзгәрешләр кертү актуальлеге калкып чыгачак, дип саный М.Имамов. Алга таба хатын-кызларның яшь буенча пенсиягә чыгарганда ирләрнекенә әкренләп тәңгәлләштерүгә омтылыш булыр дип фаразлана, ник дигәндә, 60 яшькә җиткән хатын-кызлар 60 яшьтәге ирләрдән 2 тапкырга артыграк. Татарстанда пенсионерларның уртача яше 74 яшь булса, пенсиягә чыгучыларның уртача яше – 58 яшь, шулай итеп, пенсия яшенә җитми алдан пенсиягә чыгучылар яртысын диярлек тәшкил итә, диде Пенсия фонды идарәчесе. Шуңа күрә, дәүләткә пенсионерның эшләве отышлы һәм, эшләргә омтылыш булсын өчен, кызыксындыру чаралары кулланыла: пенсионер өчен хәзер хезмәт стажы кимендә 30 ел булу отышлы, чөнки кимрәк булса, шуннан артык һәр елы өчен беркетелгән пенсиясенә 6 процент өстәлә, ким булса, киресенчә, һәр җитмәгән елына 3 процент кимрәк түләнә. Ләкин алга таба пенсия дә, хезмәт хакы да алганнарга карата аларның гомуми суммасына максималь чик билгеләү турында сүз бара, әлегә ул чикләү юк, дип белдерде М.Имамов.