Татарстанда балансланган бюджет сәясәте алып барыла, дип саныф РФ финанслар министры

Татарстанның дәүләт бурычы структурасында сизелерлек өлешне федераль бюджет кредитлары алып тора. Расланган график буенча, республика федераль бюджет кредитларының 5 млрд сум күләмендәге өлешен быел кайтарырга тиеш иде. Аны кайтару вакыты киләсе елга күчерелгән. Бу хакта бүген журналистларга Татарстанда эш сәфәрендә булган РФ финанс министры Антон Силуанов белдерде. Федераль министр бүген “Корстон”да ТР Финанс министрлыгы, Федераль салым хезмәте, Федераль казначылыкның ТР идарәләренең ел йомгакларына багышланган уртак коллегия утырышында катнашты.

Антон Силуанов Татарстанның бюджет кредитлары буенча дәүләт бурычы үсүгә карамастан, хәл алай ук куркыныч түгел, дип саный. “Бу бурычлар, беренче чиратта, Универсиадага әзерлек, юл төзелешләре белән бәйле инфраструктура проектларын гамәлгә ашыру кысаларында бирелгән бюджет кредитларына карый. Бурыч үскән, ләкин ул критик түгел. Бюджет кредитлары коммерцияле кредитлар түгел, алар арзанлы. Бу кредитларны һәрвакыт рефинанслау мөмкинлеге дә бар. Куәтле икътисади потенциалы булган Татарстан өчен бурычлар нагрузкасы рискларга илтми”, -дип ассызыклады ул.

Аның белдерүенчә, быел бурычларны түләүне киләсе елга кичектерү тәкъдиме белән республика җитәкчелеге чыккан булган. “Быел Татарстан бюджетының әйбәт үтәлүенә карамастан, Универсиадага әзерлек белән бәйле инфраструктура проектларын гамәлгә ашыру бурычы Татарстан өчен өстенлекле булып кала. Республика җитәкчелеге кредитларны каплау вакытын 2012 елга күчерү тәкъдиме белән чыккач, без килештек”, -ди федераль министр

РФ финанс министры Татарстанда тотрыклы ресурс базасы бар, ул инвестцияләр җәлеп итү ягыннан кызыклы, бирегә инвесторлар бик теләп финанслар сала, шул рәвешле, республикада сизелерлек салым потенциалы үсә, дип тә ассызыклады.