ТР Президенты һәм РФ Хисап палатасы башлыгы “Алабуга” махсус икътисади зонасында булды

Бүген Татарстан Республикасы Президенты Рөстәм Миңнеханов, РФ Хисап палатасы рәисе Сергей Степашин һәм РФ икътисади үсеш министры урынбасары Олег Савельев Алабуга” махсус икътисади зонасында булды.

Алар «Rockwool» заводының җитештерү мәйданчыгын карады,аны 2012 елның февралендә эшләтеп җибәрү күздә тотыла. Биредә җылылык изоляция материаллары җитештереләчәк, ул «Rockwool» компаниясенең Россиядәге иң зур заводы булачак. Сергей Степашин предприятиенең кадрлар сәясәте белән кызыксынды. Завод җитәкчелегенең сүзләренә караганда, уртача хезмәт хакы 25 мең сумга якын тәшкил итәчәк. Эшче кадрлар белән кайбер проблемалар бар, әмма хәзерге вакытта әлеге мәсьәләне хәл итү өчен Алабуга плитехника көллияте белән эш җайга салынган. Резидент-предприятие хезмәткәрләрен торак белән тәэмин итүгә килгәндә, хәзерге вакытта Алабугада яңа микрорайоннар төзелә. Өстәвенә, шәһәр федераль торак программаларын гамәлгә ашыру өчен мәйданчык булырга әзер. Татарстанның Алабуга районы башлыгы Геннадий Емельянов белдергәнчә, хәзерге вакытта муниципалитет бу юнәлештә эшчәнлек башлап җибәрә. Чөнки берничә елдан Алабугада яшәүчеләр саны ике тапкыр артырга һәм 150 мең кешегә җитәргә мөмкин.

Рөстәм Миңнеханов шәһәр инфраструктурасы үсешен югары бәяләде. Ул Алабуга” махсус икътисади зонасының административ-эшлекле үзәгендә узган киңәшмәдә әнә шулай дип белдерде. “Алабуга” сәнәгый җитештерү тибындагы махсус икътисади зонасы” ААҖ генераль директоры Тимур Шаһивәлиевның сүзләренә караганда, бүгенге көндә биредә 25 резидент теркәлгән, алар керткән инвестицияләрнең гомуми күләме 79 миллиард сумга җиткән. Бүген резидентлар тарафыннан 18 миллиард сум акча салынган. Шул рәвешчә, алар салган акчалар дәүләт инвестицияләреннән (бүгенге көндә ул 15 миллиард сум тәшкил итә) артып китте.

Бүгенге көндә “Алабуга”да 2432 эш урыны булдырылган; 2020 елга аларның саны 17 мең кешегә җитәргә тиеш. “Безнең өчен иң мөһиме – эш урыннары. Безнең үзебезнең резервлар, моннан тыш күрше төбәкләрдә – Удмуртия, Киров өлкәсендә яшәүчеләрне җәлеп итү мөмкинлеге бар. Шулай булгач, кадрлар кытлыгы барлыкка килергә тиеш түгел”, - диде республика Президенты Рөстәм Миңнеханов.

Фаразлар буенча, 2020 елда “Алабуга”да 60 резидент-компания эшләргә тиеш, аларның гомуми инвестицияләре 180 миллиард сум тәшкил итәчәк. Тимур Шаһивәлиевның сүзләренә караганда, дәүләт инвестицияләре 2016 елда ук үзен аклаячак.

Кунаклар шулай ук «П-Д Татнефть-Алабуга Стекловолокно» һәм «Форд-Соллерс»ның җитештерү мәйданчыкларын карады.