Казанда Халыкара "Яшьләр һәм мирас" форумы узачак

2011 елның 27 декабре, сишәмбе
ТР Дәүләт Киңәшчесе Минтимер Шәймиев 2012 елның 1-9 июль көннәрендә Казанда узачак “Яшьләр һәм мирас” Халыкара яшьләр форумын Татарстанның мәдәни тормышындагы бик мөһим вакыйга дип атады.

Бүген ТР Дәүләт Киңәшчесе, “Яңарыш” фондының Попечительләр советы рәисе Минтимер Шәймиев Казан Кремлендә Бөтендөнья мирас Комитетының 36 нчы сессиясе кысаларында “ЮНЕСКОның Бөтендөнья мәдәни һәм табигый мирасны саклау буенча киләчәк Конвенциясе” консультатив киңәшмәсен һәм “Яшьләр һәм мирас” Халыкара яшьләр форумына әзерлек буенча оештыру комитетының беренче утырышын үткәрде. Утырышта ЮНЕСКО эшләре буенча РФ Комиссиясе җаваплы секретаре Григорий Орджоникидзе, Премьер-министр урынбасары – ТР Министрлар Кабинеты Аппараты җитәкчесе, оештыру комитеты рәисе Шамил Гаффаров һәм башка рәсми затлар катнашты.

24 июньнән 6 июльгә кадәр Россия тарихында беренче тапкыр ЮНЕСКО Бөтендөнья мирас Комитетының 36 нчы сессиясе узачак. Комитет, Россияне дә кертеп, Юнесконың Бөтендөнья мәдәни һәм табигый мирасны саклау турындагы Конвенциясендә катнашучы 21 дәүләтне үз эченә ала. Комитет сессияләрендә ЮНЕСКО Бөтендөнья мирасы исемлегенә яңа номинацияләр кертү өчен гаризалар раслана. Әлеге исемлеккә Казан Кремле дә керә, ә Болгар һәм Зөя 2013 елда керергә дәгъва кыла.

Минтимер Шщймиев тәкъдиме белән, беренче тапкыр төп сессия белән параллель рәвештә, “яшьләр” сессиясен үткәрергә карар кылына. Шул рәвешчә, киләсе елның июлендә Казанда Халыкара яшьләр форумы һәм консультатив киңәшмә узачак.

“Безгә Санкт-Петербургта узачак 36 нчы сессия белән параллель рәвештә Казанда яшьләр сессиясен үткәрергә фатиха бирелде. Бу Россия һәм Татарстанның мәдәни тормышындагы бик мөһим вакыйга”, - дип ассызыклады Минтимер Шәймиев.

ТР Дәүләт Киңәшчесенең сүзләренә караганда, Бөтендөнья мирас Комитетының яшьләр сессиясе эшендә 21 илдән килгән 18-24 яшьтәге егет-кызлар катнашачак. Бөтендөнья мирас Комитеты әгъза илләренең һәркайсыннан вәкилләр булачак. Сессия эшендә катнашу өчен һәр ил киләчәктә ЮНЕСКОның Бөтендөнья мирасы исемлегенә керү ихтималы булган үз милли объектларының (табигый, милли яки катнаш объектлар) икедән артык булмаган номинациясен тәкъдим итәргә тиеш. Казандагы яшьләр сессиясендә катнашучылар онлайн режимында Петербургтагы сессиядә катнашучылар белән аралаша, ә соңыннан алар белән шәхсән таныша алачак. Бөтендөнья мирас Комитетында катнашучы илләрнең делегатлары Петербургтагы сессия төгәлләнгәннән соң яшьләр белән очрашу өчен Казанга киләчәк.

Казанда аларга, Болгар һәм Зөя белән танышуны да кертеп, бай мәдәни программа тәкъдим ителәчәк.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International