ТР Премьер-министры Илдар Халиков эшкуарларны якынлашып килүче 2012 ел белән тәбрик итте

Татарстан Республикасы Премьер-министры Илдар Халиков республика эшкуарларын якынлашып килүче 2012 ел белән котлады. Кече һәм урта эшкуарлык вәкилләре белән очрашу ТР Сәүдә-сәнәгать палатасында узды.

Тантана башланыр алдыннан ТР Хөкүмәте башлыгы һәм аны озатып йөрүче затлар халык һөнәрчелеге тауарлары урын алган күргәзмәне карады.

Тантанага җыелучыларны сәламләп, Илдар Халиков: “2009 елгы кризисны бергәләп уздык, шуңа күрә 2012 елның җитүеннән инде курыкмыйбыз”, - дип искәртте. Без алдагы елларның шактый катлаулы булачагы турында да уйламый булдыра алмыйбыз, диде ТР Премьер-министры, әмма ул елларга без әзер, чөнки берничә катлаулы икътисади кризис кичердек инде. Куәтле икътисади база 2011 елдагы эшчәнлекнең нәтиҗәсе булды, беренче тапкыр үзебездә җитештерелгән 1,3 триллион сумлык тауар төяп озату күздә тотыла, бу узган елга караганда 27 процентка артык, дип хәбәр итте Илдар Халиков.

Бүгенге көндә республикада кече һәм урта эшкуарлыкка ярдәм күрсәтү буенча күп кенә проектлар һәм программалар эшли, аларның күбесенә Рөстәм Миңнеханов Татарстан Премьер-министры булган чагында старт бирелде. Хәзерге вакытта бездә эшкуарлыкны үстерү өчен тиешле инфраструктура булдырылган – бу технопарклар, технополислар, бизнес-инкубаторлар, ИТ-парклар һәм башкалар. Аерым алганда, “Мастер” Кама индустриаль паркы территориясендә 360 мең квадрат метрлы мәйданда 160 предприятие эшли. Әлеге мәйданчыкның кереме быел 18 миллиард сумнан артып китәчәк, дип хәбәр итте Илдар Халиков.

Россиянең Бөтендөнья сәүдә оешмасына керүе – ул чит ил тауарларының безнең базарларга юл яру мөмкинлеге генә түгел, ә безнең тауар җитештерүчеләр өчен халыкара базарларга чыгу перспективасы да, дип саный Илдар Халиков. Без һәр тармак өчен шундый база булдырырга тиеш – бу ТР Сәүдә-сәнәгать палатасы, ТР Сәнәгать һәм сәүдә министрлыгының уртак бурычы.

ТР Премьер-министры узып баручы елдагы уңышлы эшчәнлек өчен барысына да рәхмәт белдерде. Нәкъ менә сез һәм сезнең коллегаларыгыз Татарстан икътисадын булдыра, диде ул. И.Халиков эшкуарларга һәм аларның якыннарына сәламәтлек, бәхет теләде.

Чарада ТР Сәүдә-сәнәгать палатасы рәисе Шамил Агиев, “Татарстан Республикасы предприятиеләр һәм эшкуарлар ассоциациясе” төбәк эш бирүчеләр берләшмәсе башлыгы Алексей Пахомов, ТР юстиция министры Мидхәт Корманов, Федераль салым хезмәтенең ТР буенча идарәсе җитәкчесе Марат Сафиуллин һәм башкалар катнашты.