Премьер-министр Владимир Путин Татарстаны көчле төбәкләр сафына кертте

Башкарма хакимиятнең нәтиҗәле эшчәнлек дәрәҗәсе буенча Татарстан Россиянең көчле төбәкләре исемлегенә керә. Бүген селектор киңәшмәсе барышында РФ Премьер-министры Владимир Путин шулай дип белдерде. Видеоконференция режимында узган киңәшмә РФ төбәкләре башкарма хакимияте органнары эшчәнлегенең нәтиҗәлелеген бәяләү мәсьәләсенә багышланган иде. Анда ТР Президенты вазифаларын башкаручы- Премьер-министр Илдар Халиков та катнашты.

Владимир Путин сүзләренә караганда, илнең гомуми хәле төбәкләрнең үзләрен ничек хис итүенә бәйле. Шул ук вакытта, ди ул, аерым төбәкнең хәле табигый байлыклар булуга һәм федераль үзәктән күрсәтелгән ярдәмгә генә бәйләнмәгән, аны федерация субъектлары җитәкчеләренең активлыгы да билгели.

Россия Хөкүмәте рәисе РФ төбәкләре башкарма хакимият органнары эшчәнлегенең нәтиҗәлелеген бәяләү методикасын камилләштерергә кирәк, дигән фикердә. “Бәяләү критерийлары еш кына кәгазьдә бик җәлеп итәрлек булып күренә, хакыйкатьтә гражданнар аларның эшчәнлеген түбән бәяли”, - ди Путин. Аның фикеренчә, мондый аерма дәүләт җитәкчелеген бу бәяләрнең ни дәрәҗәдә объективлыгы турында җитди уйланырга этәрә. Владимир Путин төбәк хакимиятләренең эш нәтиҗәлелеге халыкның яшәү дәрәҗәсендә турыдан-туры чагылыш тапсын өчен тырышырга кирәк, ди. Ул төбәк башкарма хакимият органнары эшчәнлеген бәяләү системасын камилләштерү буенча РФ Хөкүмәте тарафыннан конкрет адымнар ясалуын хәбәр итте. Аерым алганда, җәлеп ителгән инвестицияләр күләме дигән критерий кулланылышка кертелгән. “Бездә Татарстан, Краснодар крае, Төмән, Белгород өлкәләреннән көчле төбәкләр үзәге формалашты”, - дип белдерде РФ Премьер-министры.

Путин РФ Төбәкләр үсеше, Икътисади үсеш, Финанс министрлыкларын бәяләүнең яңа методикасын эшләүне тизләтергә чакырып, аңа бәйле таләпләрне искәртте. Владимир Путин сүзләренә караганда, бәяләүнең яңа методикасы ачык, анык критерийларга, шул исәптән гражданнарның иҗтимагый фикеренә нигезләнергә тиеш. “Бәяләү системасы төбәкләргә баланслы үсешкә этәргеч бирергә тиеш”, -ди ул. Премьер-министр шул ук вакытта төбәкләргә финанс ярдәмен күрсәтү системасын да камилләштерү зарур, дип саный. “Яңа механизм җәмәгатьчелек - эшмәкәрләр, иҗтимагый берләшмәләр белән тыгыз элемтәдә эшләнергә тиеш”, - ди ул.