Рөстәм Миңнеханов: "Татарстан һәм Лодзь воеводалыгына уртак гамәли проектлар табарга кирәк"

Татарстан Республикасы һәм Польша Республикасының Лодзь воеводалыгына эшкуарлык, мәдәният, белем бирү өлкәсендә хезмәттәшлекне үстерергә һәм уртак проектларны гамәлгә ашырырга кирәк. Бүген Татарстан Президенты Рөстәм Миңнеханов Лодзь воеводасы Йоланта Хелминская ханым җитәкчелегендәге Лодзь воеводалыгы делегациясе белән очрашу барышында әнә шундый фикер белдерде.

Казан Кремлендә узган очрашуда шулай ук республика Хөкүмәте вице-премьеры Зилә Вәлиева, Татарстан сәнәгать һәм сәүдә министры Равил Зарипов, ТР Президентының Тышкы элемтәләр департаменты директоры – ТР Президенты ярдәмчесе Искәндәр Мөфлиханов, ТР Инвестицион үсеш агентлыгы җитәкчесе Линар Якупов, “Казаноргсинтез” ААҖ генераль директоры Леонид Алехин, “Татнефтехиминвест-холдинг” ААҖ генераль директоры Рафинат Яруллин катнашты.

Лодзь воеводалыгы делегациясе Татарстанга дүрт көнлек визит белән килде. Кунаклар IT-паркта булып, республика Дәүләт Советы Рәисе Фәрит Мөхәммәтшин белән очрашты инде. Сәфәр программасында шулай ук Казани федераль университеты, “Алабуга” махсус икътисади зонасы, “КАМАЗ” ААҖ һәм “Мастер” Кама индустриаль паркында булу каралган. Делегция составына Польшаның берничә компаниясе вәкилләре керә.

Казан Кремлендәге бүгенге очрашу барышында Рөстәм Миңнеханов делегациянең визиты Татарстан һәм Лодзь воеводалыгы арасындагы сәүдә-икътисади мөнәсәбәтләр, фәнни-белем бирү, мәдәни элемтәләргә яңа этәргеч бирәчәгенә ышаныч белдерде. “Илләр дәрәҗәсендә генә түгел, субъектлар дәрәҗәсендә дә хезмәттәшлек итәргә кирәк”, - дип белдерде Татарстан Президенты.

Ул соңгы вакытта Татарстан һәм Польша арасындагы элемтәләрнең активлашуын искәртте. “Узган ел Польша илчесе ике мәртәбә Казанда булды, мин декабрь аенда Гданьскига сәфәр кылдым. Бездә “Ак бөркет” Польша җәмгыяте, Польша католиклар мәхәлләсе, поляк телендә белем бирүче мәктәп эшләп килә”, - диде Рөстәм Миңнеханов.

“Без Лодзь воеводалыгы белән 1996 елдан бирле элемтәдә торабыз, Сезнең визит мөнәсәбәтләрне яңартып җибәрер дип өметләнәм, - диде ТР Президенты. – Безгә эшкуарлык, белем бирү, мәдәният, спорт өлкәсендә гамәли проектлар табарга кирәк”.