Казанга Красноярски крае делегациясе килде

Бүген Казанга губернатор Лев Кузнецов җитәкчелегендә Красноярски крае делегациясе килде. “Казан” халыкара аэропортында кунакларны ТР Президенты Рөстәм Миңнеханов, Премьер-министр вазифаларын башкаручы Равил Моратов каршы алды.

Делегация вәкилләре аэропорттта 1А терминалы төзелеше һәм биредәге модернизация проекты белән белән танышты. Татарстан Президенты губернаторга аэропорттагы ике төп терминалның елына 2,5 млн пассажир уздырырыга сәләтле булуын җиткерде. Ә очыш полосасының озынлыгы реконструкция эшләреннән соң 2,5 км дан 3,75 км га кадәр җитәчәк. Полоса үзе төрле очкычларны, хәтта дөньядагы иң эре пассажир авиалайнеры А380 аэробусын кабул итәргә дә сәләтле.

Бер үк вакытта “Россия тимер юллары” белән бергә аэропортка “Казан” тимер юл вокзалыннан интермодаль пассажирлар ташуны оештыру проекты да гамәлгә ашырыла.

Губернатор Лев Кузнецов үз чиратында Красноярскиның да үз аэропортын рекорнструкцияләргә җыенуын белдерде. Шуңа да бу өлкәдә Казан тәҗрибәсе төбәккә бик кызыклы.

Красноярски 2019 елгы Кышкы Универсиаданы кабул итүгә дәгъва итәргә җыена. Шул җәһәттән төбәкне Казанда халыкара студентлар спорты уеннарына әзерлек буенча тәҗрибә дә кызыксындыра. Делегация әгъзалары аэропорттан соң Универсиада авылында булды. Биредә кунаклар спортчылар һәм студентларның яшәү шартлары белән танышты. Красноярски губернаторы традиция буенча биредә мактаулы кунаклар китабында язма калдырды.

Теннис академиясендә исә кунакларга Физик культура һәм спорт буенча Идел буе академиясе презентацияләнде. Универсиада-2013 дирекциясе җитәкчесе Владимир Леонов делегация әгъзаларына студентлар уеннарын уздыруга әзерлек хакында җентекләп сөйләде.

Бүген Казан Кремлендә ТР Президенты Рөстәм Миңнеханов белән Красноярски крае губернаторы Лев Кузнецовның рәсми очрашуы узачак. Делегациянең Татарстанга сәфәр программасында шулай ук Универсиадага әзерләнгән башка объектларда булу, IT-парк белән танышу, Халыкара студентлар спорты федерациясенең беренче вице-президенты Олег Матыцин һәм FISUның җәйге Универсиадалар директоры Марк Ванденплас белән очрашу каралган.