Рөстәм Миңнеханов Россия эчке эшләр министры урынбасары Сергей Булавинбелән очрашты

Бүген Татарстан Республикасы Президенты Рөстәм Миңнеханов Россия эчке эшләр министры урынбасары Сергей Булавин белән очрашты. ТР Хөкүмәте йортында узган очрашуда ТР Премьер-министры Илдар Халиков, ТР буенча эчке эшләр министры Әсгать Сәфәров, ТР Куркынычсызлык советы секретаре Валерий Власов һәм башкалар катнашты.

Яклар Эчке эшләр министрлыгы системасын реформалаштыруның барышы, хокук бозуларны кисәтү, Татарстан һәм Россия территориясендә экстремизм һәм террорчылыкка каршы тору мәсьәләләре хакында фикер алышты.

Искәртеп узабыз, Сергей Булавин Казанга ике көнлек визит белән килде. Сәфәр кысаларында ул ТР буенча Эчке эшләр министрлыгының яңа бинасында булачак, Россия Эчке эшләр министрлыгының Казан шәһәре буенча идарәсе эше белән танышачак.

Бүген Россия эчке эшләр министры урынбасары Сергей Булавин Татарстан Республикасы буенча Эчке эшләр министрлыгы коллегиясенең киңәйтелгән утырышында катнашты һәм республика гаммәви мәгълүмат чаралары вәкилләренең сорауларына җавап бирде.