Әсгать Сәфәров: “Оператив вазгыять әз генә үзгәрсә дә, министрга шәхсән хәбәр итү таләбе куела”

Хәзерге вакытта Татарстанда 100дән артык оешкан җинаятьчел формированиенең (ОПФ) 10 меңнән артык әгъзасы ТР буенча Эчке эшләр министрлыгы исәбендә тора.

Бүген коллегия утырышында ТР буенча эчке эшләр министры Әсгать Сәфәров хисап белән чыгып, алдагы ел бурыч-максатларының берсе буларак 2 хәтәр мәсьәләне хәл итүне кузгатты. Шушы җинаятьчел формированиеләрнең иректәге әгъзалары арасында, тагын яшьләр төркемнәре (группировкалары) арасында әледән-әле тәэсир итү даирәсе һәм беренчелек бүлешү буенча бәрелешүләр булып ала. Сәләфиләр - традицион булмаган ислам тарафдарлары Казан, Чаллы, Түбән Кама, Әлмәт, Менделеевскида аеруча актив. Яшьләр арасында радикаль экстремистик оешмалар, шул исәптән “Хизб-ут-Таһрир әл-Ислами” кебек халыкара террористик оешмасы, “Әт-Тәкъфир вәл-Һиҗра”, “Таблиги-Җәмәгать” һ.б. хәрәкәтләр тарафдарлары саны артуы күзәтелә, миләтчел һәм профашистик карашлылар мәсьәләләре актуальләшә бара, дип таный министр. Былтыр, мәсәлән, полиция хезмәткәрләре экстремистик һәм террористик юнәлешле 18 җинаять ачыклаган һәм алар шушы оешма-хәрәкәтләр тарафдарларына нисбәтле: җинаять җаваплылыгына 31 кеше тартылган.

Шуңа күрә, оператив вазгыять әз генә үзгәрсә дә, министрга шәхсән хәбәр итү таләбе куела, диде Ә.Сәфәров. Экстремизм мәсьәләсендә ул, бу юк нәрсә, үсмерчак бетчәсе кебек, үсә төшкәч бетә ул, дип фикер йөртү – тамырдан ялгыш. Бәйдән ычкынган, ягъни идарәсез яшьләр оешмаларының ниләр майтарасын беркем күзаллый алмый, шуңа күрә, вазгыятьне күздән ычкындырырга ярамый, дип, министр Париж, Лондон кебек Европа илләре башкалаларындагы яшьләр кабызып, урамнарны дөрләткән утны, җимерекләрне искә төшерде. “Белеп эш итсәң, алар сөйләшүгә бара, алар белән диалогта булу кирәк”, - дип юнәлеш бирде Ә.Сәфәров.

Болардан тыш, былтыр 130 меңнән артык чит ил кешесе республикага мигрант рәвешендә килгән һәм аларның кунакчыл Татарстанга чынлыкта нинди ният белән килүен, кайсы хәрәкәт тарафдары булуын – кара урман кебек. Димәк, мигрантлар белән эшне көчәйтү таләбе бар, дип басым ясап әйтте министр ТР Президенты Рөстәм Миңнеханов катнашындагы коллегия утырышында.