Рөстәм Миңнеханов Давоста Бөтендөнья икътисад форумын ачу тантанасында катнаша

Бүген Татарстан Республикасы Президенты Рөстәм Миңнеханов Бөтендөнья икътисад форумында катнашу өчен Давоска (Швейцария) килде. Рөстәм Миңнехановны ТР Президентының Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов, “Татнефть” ААҖ генераль директоры Шәфәгать Тәһаутдинов, “КАМАЗ” ААҖ генераль директоры Сергей Когогин һәм башкалар озатып йөри.

Форум “Зур трансформация: яңа модельләрне формалаштыру” дигән темага 25-29 гыйнвар көннәрендә уза. Фикер алышулар үсеш һәм мәшгульлек модельләре; лидерлык һәм инновацияләр модельләре; тотрыклылык һәм ресурслардан файдалану модельләре; социаль һәм технология модельләре юнәлешләре буенча оештырыла.

Давос форумында 90 нан артык илдән хакимият структуралары, бизнес-элита һәм иҗтимагый оешма вәкилләре (2,6 меңнән артык кеше) катнашыр дип көтелә.

Чарада Россияне РФ Хөкүмәте вице-премьеры Игорь Шувалов җитәкчелегендәге делегация тәкъдим итә. Иртәгә форум кысаларында ВТБ исеменнән әйдәп баручы халыкара инвесторлар һәм Россия компанияләре катнашында “Россиядә чит ил инвестицияләре: рисклар һәм мөмкинлекләр” дигән эшлекле төшке аш, шулай ук “Россиянең перспективалары” дигән сессия узачак.